■ PROSESO SA PAG-ABOT:
Ang mga overseas Filipino worker (OFW) nga nangabot sa Martes sa kaadlawon, Abril 28, 2020 gikan sa Manila nganhi sa Cebu mipailawom sa protocol sa ilang pag-abot sa Pier 6. Gipakita usab sa hulagway ang seguridad ug mga bus nga modala kanila sa ilang tagsa ka isolation centers, sama sa mga hotel.
Kasagaran sa 291 ka mga overseas Filipino worker nga taga Central Visayas nga nangabot dinhi sa Dakbayan sa Sugbo gikan sa Manila, Abril 28, 2020 naa sa tulo ka mga hotel sa Dakbayan sa Sugbo gi-quarantine.
Sa 291, ang 47 nga taga Bohol gipasakay sa barko padung sa Tagbilaran City sa Martes sa hapon.
Ang 244 naa sa tulo ka mga hotel gipapuyo, matod ni Cebu City Councilor Joel Garganera.
Ang mao nga mga OFW nagagikan sa Siyudad sa Sugbo, Mandaue, Lapu-Lapu ug kalungsoran sa lalawigan sa Sugbo.
Matod ni Garganera nga ang tulo ka hotels 24 oras nga gibantayan sa Cebu City Police Office (CCPO) aron pagseguro nga ang mao nga mga tawo di makagawas.
Matod ni Garganera nga pagabot sa ika-12 nga adlaw, ipailawom sila sa laing swab test aron pagseguro kon wa ba silay coronavirus disease (Covid-19).
Kon wala, papaulion sila sa tagsa-tagsa nila ka dapit, matod ni Garganera.
Si Garganera mao ang gitahasan ni Cebu City Mayor Edgardo Labella sa pag-atiman sa mga OFW.
Ang mga OFW nga taga lalawigan sa Sugbo mosagubang pa og laing pagsuway human sa 14 ka adlaw nga quarantine dinhi sa Dakbayan.
Si Gobernador Gwendolyn Garcia, sa iyang press conference sa Martes, Abril 28, 2020, niingon nga kinahanglan i-coordinate sa ilang tagsa ka local government unit (LGU) ang mao nga mga tawo.
Kini alang sa laing 14 ka adlaw nga quarantine.
“Magrespetuhay lang ta,” pamahayag ni Garcia sa iyang pagdumili nga makauli og diretso ang mao nga mga OFW sa lalawigan.
Gikinahanglan pa nila nga mag quarantine sa Dakbayan sa Sugbo una pa sila makauli.
Ang mao nga mga OFW gihatagan na og signal sa Overseas Workers Welfare Administration (Owwa) ug Department of Health (DOH) una sila gitugtang makauli sakay sa barko sa 2Go.
Sa Manila pa lang, gipailawom sila sa 14 ka adlaw nga quarantine isip protocol sa kagamhanan.
Sa wa pa sila makakanaug sa barko, gi-disinfect una ang sakyanan sa dagat.
Gipailawom sab ang tanang mga OFW sa thermal scan.
Sa ilang pagkanaug, giproseso ang ilang mga papelis sa Owwa.
Human ini, subli na usab silang gihiling sa DOH personnel.
Ang tanang nanugat kanila sa Pier 6 puro naka personal protective equipment (PPE).
Human mahikay ang mga papelis ug mahiling, gipasakay sila sa mga bus nga naghuwat kanila ug gipanghatod sa tulo ka mga hotel sa Dakbayan sa Sugbo.