17-ANYOS SA CARCAR NAMATAY SA COVID-19

Usa ka 17 anyos nga lalake nga nagpositobo sa coronavirus disease 2019 (Covid-19) nga taga Barangay Guadalupe, dakbayan sa Carcar ang namatay.

Kini maoy gipahibawo ni Cebu Governor Gwendolyn Garcia sa press conference sa Lunes, Abril 27, 2020.

Ang maong pasyente nakabsan sa kinabuhi niadtong Sabado, Abril 25, 2020.

Na-admit kini sa Vicente Sotto Memorial Medical

Center (VSMMC) sa Abril 23 apan matod pa nga na-diagnose na kini sa sakit nga kidney sa tuig 2018. Mao kini ang ikaupat nga pasyente nga natala sa probinsya sa Sugbo.

Matod ni Garcia nga nagpahigayon na ang dakbayan sa contact tracing sa lugar ug mga tawo nga nakahugoy-hugoy sa maong pasyente.

Tungod niini gimandoan ni Garcia ang tanan nga mga municipal ug city health officers nga seryusohon ang pag monitor ug ang pag report sa mga kaso sama sa influenza like illness (ILI) ug Severe Acute Respiratory Infection (SARI) sa mga kalungsoran ug barangay.

“Gikinahanglan nga mas aggressive inyong reporting karon sa tanan nga naay influenza like illnessess or SARI. Kinhanglan aggressive inyong monitoring. I am tasking you,” matod ni Garcia.

Sa pagkakaron, moabot sa 4,735 ka mga persons under monitoring (PUM) ang natala lukop lalawigan.

Samtang 63,247 na usab ang nakahuman na sa 14 ka adlaw nga quarantine.

Sa Huwebes, usa ka panagtigom ang ipahigayon sa kapitolyo kauban ang tanan nga MHO ug CHO aron hisgutan ang pamaagi sa pagpahigayon sa targeted testing sa probinsya ug ang mga dugang protocols nga ipatuman sa lalawigan aron mapugngan ang pagkatap sa kagaw sa coronavirus disease (covid-19).