Istriktuhon ang pagbantay sa mga checkpoints: Garcia
Human makadawat og impormasyon si Cebu Governor Gwendolyn Garcia nga adunay mga tawo nga nakalusot gikan sa dakbayan sa Sugbo paingun sa mga lungsod sa probinsya, gipahugtan na karon ni Police Colonel Roderick Mariano ang ilang gipang montar nga quarantine control points.
Ang kasayuran nga nakuha sa gobernador nga adunay mosakay sa mga ambulansya, truck nga mag karga og utanon diin magpabayad ang driver aron lang makalusot sa mga checkpoints.
Matod ni Mariano nga ning bag-o lang adunay mga armored vehicle ang giingong mag-smuggled usab og mga pasahero ug ipasulod kini sa mga lungsod kung asa kini nanimuyo.
Tungod niining maong impormasyon gimandoan niya ang tanang nagbantay sa mga checkpoints nga susihon gyud ang mga sakay sa mga sakyanan nga exempted nga makabyahe pasulod ug pagawas sa probinsya sa Sugbo.
“Recently mayron din tayo daw sa mga armored car na humihingi ng bayad, so that’s why nagkaroon ng memorandum din dyan regarding sa armored car but ang kagandahan naman ay very cooperative naman yung ating mga bankers association na they allowed na makita ang nasa loob,” matod ni Mariano.
Mag-atubang og kaso ang mga tawo nga magpadayon sa paglapas sa executive order sa kagamhanan sa lalawigan sa Sugbo samtang ang mga drivers nga magpasakay isyuhan usab og ticket o kaha kasamtangan kining imbargohon.
Giistrikto ni Mariano ang pagpatuman sa enhanced community quarantine human sa pagpositibo sa usa ka pasyente sa Vicente Sotto Memorial Medical Center nga taga dakbayan sa Carcar.
Gipa-lockdown na usab niya ang sitio Tumpag, Barangay
Guadalupe sa maong siyudad diin wala lang unay makagawas nga mga residente. Hinuon matod niya nga naa kini mahimutang sa hilit nga lugar diin lagyo na kaayo ang kabalayan.
Aduna nay gitahasan si Mariano nga mo-trace sa posibling nakatakod sa batan-on nga maoy hinungdan nga nag positibo siya sa coronavirus disease 2019.
Wala usab nila wad-a ang posibilidad nga natakdan ang batan-on sa sulod sa tambalanan tungod kay ang unang gipamati niini mao man ang sakit sa kidney.