BJMP mihimakak sa mga pasangil

Gihimakak sa Bureau of Jail Managment and Penology (BJMP) ang alegasyon nga ihatod ra diritso sa mga barangay ang mga piniriso nga nalakip sa ilang pre-bargaining program nga wala nakig-coordinate sa mga barangay.

Sigon ni JSInsp. Jay Ylanan, Health Service Division chief sa BJMP 7, nga dili tinuod ang alegasyon nga idiretso lang nila sa paghatod ang mga piniriso sanglit aduna sila’y gisunod nga mga protocol.

Kini agig tubag sa pipila ka mga barangay sa Cebu City ang mireklamo tungod sa maong pamaagi nga idiretso lang pag-drop ang mga piniriso. Niini gibati og kahadlok ang mga barangay sa posibilidad nga mao kini magdala sa coronavirus disease 2019 (Covid-19) sa ilang lugar.

Niadtong Biyernes, Abril 24, 2020, naukay ang mga residente sa Brgy. Pahina Central, dakbayan sa Sugbo human ang usa ka babaye nga piniriso sa Cebu City Jail (CJJ) giingong gibilin sa mga personnel sa BJMP nga way koordinasyon sa barangay.

Ang babaye nga dunay kasong paghupot sa drug paraphernalia, nakagawas sa CCJ, apan way dalang medical record nga magpakitang siya negatibo sa coronavirus disease (Covid-19).

Apan nagtuo si Ylanan nga aduna lang siguro’y gamayng wala pagkasinabtanay tali sa barangay ug sa jail officers nga naghatod sa mga piniriso.

Gani wala silay nadawat nga pormal nga reklamo gikan sa mga barangay diin ang mga bagong laya nga priso gihatod.

Sa protocol nga gisunod sa BJMP 7, sa dili pa nila ipagawas ang mga piniriso, moagi una kini og health check-up lakip na ang swab testing.

Makig-coordinate sila niini sa local health centers ug sa Department of Health una magpagawas sa piniriso.

“We are very cautious about it nga dili sad mo-spread (ang virus),” ingon ni Ylanan

Kung mag-negatibo kini ihatod kini ngadto sa barangay ug pahibaw-on nila ang barangay nga laya na ang maong priso ug mamahimo nang mouli.

Kung mag-positibo ang piniriso dili una kini ihatod sa barangay ug ihatod kini diretso sa ospital.

Sa panahon nga mahatod na ngadto sa barangay ang mga piniriso, pagbuot na sa mga opisyales sa barangay kung unsa ilang mga protocol nga ipatuman una makauli sa panimalay ang maong bag-ong laya.

Mga alas 5 sa hapon sa Biyernes, naabot ang usa ka sakyanan sa BJMP kay gihatod ang usa ka “Christine.”

Matod sa mga residente nga igo lang nipahibawo sa mga tawo ug tanod nga clear na ang babaye nga piniriso.

Si Kapitan Carlo Yap sa Brgy. Pahina Central nga nahinabi sa Superbalita Cebu, daling mihimog aksyon.

Gikaestorya gilayon si “Christine” ug gipasalig niini nga papuy-on og lodging house aron mapaubos sa quarantine. Samtang mi-coordinate na siya sa taga Cebu City Health aron makuha ang record sa swab test niini gikan sa CCJ.