Rapid testing sa Lapu himuon: Chan

Gikatakdang ipaubos sa rapid mass testing ang diyes porsiyento sa populasyon sa dakbayan sa Lapu-Lapu sa mosunod nga mga adlaw.

Kini aron masuta kinsa ang nataptan sa coronavirus disease 2019 (Covid-19).

Gituyo kini, matod ni LapuLapu City Mayor Junard “Ahong” Chan, aron sa ingon ma-isolate gilayon ang natakbuyan sa maong kagaw ug mapalayo sa wala matapti.

Mao kini ang usa sa mga paagi, sumala pa ni Chan, aron sa ingon maghinay-hinay na og balik sa normal ang kahimtang sa mga Oponganon gikan sa enhanced community quarantine (ECQ) nga gipatuman sukad pa niadtong Marso 29.

Sa higayon nga mag positibo sa rapid mass testing ang usa ka indibidwal, hayan ipaubos pa kini ug laing test nga mao ang polymerise chain reaction test kun PCR aron masuta nga positibo ba gayud kini o dili.

Apan samtang maghulat sa resulta sa PCR i-isolate lang una kini aron masigurong dili na kini makatakod pa.

Kung mag positibo gyud gihapon hayan ipahimutang na kini sa usa ka pasilidad sa dakbayan samtang ang mga moatiman niini nga mga personnel dili usab pagawson sa pasilidad aron masigurong dili makatakod ug laing mga tawo.

Nindot nga mga higdaanan ug aduna pay kini wi-fi sulod sa pasilidad. Maayong pag-atiman ang itagana sa kagamhanan alang kanila sumala hangtod na sila maulian sa ilang gipamati, matod pa ni Chan.

Nakasabot si Chan nga ganahan na mobalik sa naandang kinabuhi ang tanan lakip na usab sila apan dili gyud kini mahimo kung dili sila mopahigayon ug rapid mass testing.

Pasalig ni Chan libre ang mass

testing alang sa ipaubos niini. “Mohangyo ako sa inyo pagsabot nganong kinahanglan nato nga pagabuhaton kining maong mga lakang. Kung dili kita mag rapid mass testing magsige na lang ta og extend ug walay kahumanan ang atong ECQ. Dili na nato makaya nga madugay pa ang kining atong suliran, nag anam-anam na og kahurot ang pundo sa atong kagamhanan ug sa dili madugay wala na gyud tay kwarta ang atong dakbayan,” pasabot ni Chan.