Maanad sa kadugayan?

Ang kinabuhi depende lang sa paanad. Sa unang higayon sa kalit nga kabag-ohan sa atong pagpuyo nga lockdown, medyo kuyaw. Apan sa kadugayan, kapin sa buwan na, sama sa daghang bag-ong normal sa atong pagpuyo. Ang dakbayan sa Sugbo nipatuman sa community quarantine niadtong Marso 15. Giisa sa enhanced community qaurantine (ECQ) niadtong Mayo 28 ug kini gilugwayan ngadto sa Mahyo 15, 2020.

Ug unang dakong kalamboan sa atong pagpuyo dihang medyo naanad na mao ang pagtamod sa personal ug community hygiene. Ang paggamit sa face mask, disinfection gamit ang alcohol bisan asang dapit karon, social distancing ug uban pa nga maayong mapadayon bisan wala na ang ECQ.

Hinuon, ang panagtapok sa publiko napagan labi na ang tradisyonal nga pagsimba, maayong mabalik human sa kwanrentina.

Kahinumdoman, niadtong pagbuto sa coronavirus disease 2019 (Covid-19), grabe ang kabalaka. Makapraning tungod sa mga balita labi na sa social media nga liboan ang nangamatay sa ubang nasod sama sa China diin nagsugod ang virus, Italya, US ug uban pa.

Ug karon naa na dinhi sa atong dapit. Ang dakbayan sa Sugbo maoy nag-una sa Central Visayas sa daghang kaso sa Covid-19 ug nagtubo matag adlaw, apan dili na grabe ang reaksiyon. Ang kanunay nga update sa Covid-19 sa media, normal na lang kaha kanila?

Seguro nakaamgo kaha nga molabay lang kini? Sa kasaysayan, ang truberculusis (TB), leprosy ug uban pa, nomugna og susama sa kahimtang sa Covid-19. Karon, ang naasoyng mga sakit sama sa normal na lang. May tambal na ug bakona pa.

Sa Covid-19 pandemic, ang tanan napagan - dato o kabus. Apan dili kita mawad-an sa paglaum human kining tanan, giasoy sa taas, lumalabay. Mahimo kini bag-ong normal sa dili madugay.

Ang importante karon, nakaplano ka na ba alang sa imong pagbangon human sa krisis o pagtapos sa lockdown? Kini ang angay pangandaman.