I want you to be my lover

Miabot ang punto nga kinahanglang modesisyon ko. Bisan sakit gyud tuod sa akong kaugalingon nga kalimtan ug likayan si Patrick apan gibuhat gyud nako kini. Para ra sab kini sa akong kagawasan, usa ka kagawasan sa akong paghigugma kang Patrick. Sure ko nga si Gina na ang hatagan og dakong pagtagad ni Patrick.

Usa ka gabii nga naghigda na ko, mikiring ang akong selpon. Pagsusi ko pa, si Patrick ang nagpadalag message nako. “Musta?”

Human kog basa sa giteks ni Patrick nako, gi-delete dayon nako kini. Wa ko moreplay kang Patrick. Mitingog na sab ang akong selpon. Gilargo kog delate ang text message kay si Patrick man gihapon ang nagteks nako.

Wa na mokiring ang akong selpon. Mihigda kog tarong kay gusto na kong matulog. Apan as usual, wa sab ko ko makatulog. Pipila na ka gabii nga kuwang ko sa tulog. Gikaguol ko gyud ang pagkaputol sa among panagsuod ni Patrick tungod sa pagpauli ni Gina dinhi sa Cebu. Nasuta gyud nako nga true love ang gibati ni Patrick kang Gina.

Wa gyud diay magbakak si Patrick nako dihang iya kong gisultihan nga tinud-anay ang iyang paghigugma kang Gina. Gisakitan kaayo si Patrick dihang miadto sa Canada si Gina.

Kadlawon na sab kong nakatulog. Ug kay way klase, dugay na sab kong migawas sa akong kuwarto. Taas na ang adlaw dihang namahaw ko. Naligo ko daan sa banyo nga diha ra sab sa sulod sa akong kuwarto. Dunay kaugalingong banyo ang akong kuwarto. “Musta ang akong darling?” Nakatan-aw ko kang Papa nga milingkod sa akong atbang samtang nagkaon ko sa kumedor. Milingkod sab si Mama tapad kang Papa. Darling ang ilang tawag nako. Seryuso sila nga nagtan-aw pag-ayo nako.

Miinom ko sa tubig sa akong baso kay morag natuk-an ko. Miginhawa ko pag-ayo.

“Tug-ani mi sa tinuod, Grace. Nakamatikod mi si Papa nimo nga ning pila ka adlaw nga milabay, nagmagul-anon ka.”

Igo lang kong mipasiplat kang Mama. Unya naghilak kong mitug-an sa akong parents sa tanan. Wa koy gitago nila.

(SUMPAYAN)