Corporal punishment

Dear Atty. Joan,

Duna ko’y Grade 2 nga anak. Ang akong bata nakasala sa iyang magtutudlo sa wa pa gisuspenso ang pagtungha tungod sa Covid-19. Tungod kay duna’y pagkasi-aw ang akong bata, gibutangan niya og chewing gum ang lingkuranan sa iyang magtutudlo.

Tuod man, nalingkuran gyod sa iyang maestra ang bangko ug nipilit gyod ang chewing gum. Matod pa, nisyagit ang magtutudlo ug gipangutana ang iyang klase kon kinsa’y nagbutang ato sa iyang lingkuranan. Gitudlo dayon sa mga tinun-an ang akong bata nga lalaki.

Wala man gyod nitug-an sa tinuod ang akong bata. Wala sab kini nangayog pasaylo sa magtutudlo. Mao nga ang sunod nga gibuhat sa maestra mao ang pagpaadto sa bata sa atubangan ug gipakaon niya kini og papel. Siyempre, nasaksihan kini sa iyang mga classmate. Gikataw-an ra sa akong bata ang magtutudlo.

Tungod kay wa man matagam, gibunalan niya ang akong bata atubangan sa iyang classmates. Didto na nitiyabaw ang akong bata. Gitamparos pa niya kini sa iyang baga nga folder. Gibunalan niya ang akong bata hangtod nangayo kini og pasaylo.

Gusto unta nako manubag ang magtutudlo sa iyang gibuhat sa akong bata. Mura og na-trauma gyod ang akong bata.

Nakasabot ko nga duna’y sala pod akong bata nganong nahitabo to. Apan bata lang ang akong anak. Mahimo pa ba diay na ang corporal punishment sa mga bata karon? Unsa’y angay nako buhaton?

Imong magtatampo,

Stel

Dear Stel,

Una sa tanan maayong adlaw usab kanimo diha Stela ug salamat sa imong pagsunod niining lindog.

Ang corporal punishment mao ang physical o mental nga pag-abusar sa bata isip pamaagi sa pagdisiplina sama sa pagpakauwaw sa bata, verbal abuse, ug uban pang porma sa pagpakauwaw ug ug pagpangabuso sa bata. Kini maoy naandan sa kadaghanan niadtong unang panahon.

Isip usa ka magtutudlo, usa ka dakong kalapasan ang nahimo niya sa imong anak. Tinuod nga responsibilidad sa mga magtutudlo ang pagdisiplina sa mga estudyante, apan dili sakto ang mga pamaagi nga iyang gihimo ngadto sa imong anak.

Wala’y balaod nga modapig sa magtutudlo sa iyang gibuhat nga pagpakaon niya og papel ug pagbunal sa imong bata. Ubos sa Family Code, ang mga magtutudlo gitagaan og special parental authority sa mga bata nga ilang gitudlu-an. Subay sa maong responsibilidad, ginadili ang paggamit og corporal punishment sa mga bata. Mahimo gyod ninyong ikiha ang magtutudlo sa kalapasan sa Special Protection of Children Against Abuse, Exploitation and Discrimination Act o Republic Act No. 7610. Ubos sa maong balaod, usa ka krimen ang pagpangabuso, pagpahimulos, o pagbutang sa bata sa kahimtang nga nga makadaot sa iyang paglambo. Mamahimong mabalhog ang magtutudlo kon mapatud-an ang mga akusasyon batok kaniya ngadto sa husgado.

Hinaot unta nga nakahupay ang maong tambag sa naghoot mo karon nga galamhan.

Imong alagad,

Atty. Joan