‘Kinawat’ nga manok wa makaon kay pulis nangabot

Andam na ang mga lamas ug nagpabukal na untag ininit tubig ang tulo ka gikatahapang mga kawatan dihang naabtan sa mga pulis sa alas 9 sa Lunes sa gabii sa Brgy. Paculob, lungsud sa Dumanjug, Sugbo.

Ang mga suspek nga naglakip sa duh aka mga menor niingon nga nagutman na sila tungod sa enhanced community quarantine (ECQ) diin gidili ang pagpamasahero

Si Sherwin Allosada, 22, traysikad driver, napusasan uban sa iyang 15 anyos nga manghud, ug 17 anyos nga ig-agaw, pulos sab mga trisikad driver.

Si Major Ardioleto Cabagnot, hepe sa Dumanjug Police station nga nahinabi sa Superbalita Cebu, nibutyag nga ang tulo naaktuhan sa ilang mga sakop dihang nihimog follow up operation human ang caretaker sa Thunder Cock Gamefarm nangayog abag sa kapulisan.

Ang farm gipanag-iya sa negosyanting si Thomas Lim Chong Sy, Jr. ,63, taga Dakbayan sa Sugbo. Matod ni Cabagnot, nga gawas sa duha ka mga manok igtatari, gidala sab sa mga kawatan ang dakong kawali.

Ang mga manok mahalon, tag P6,000 matag usa samtang ang kawali mokantidad sab og P10,000.

Ang tulo ka mga kawatan nakatiempo unta, nakasulod sa farm, pero gidemalas kay nasigpatan sa caretaker sa ilang pagsibat hinungdan nga nadakpan sa ilang panimalay.

"Ilaha ra gyud nga isud-an, Sir. Ready na tanan, nagpabukal na unta silag ininit tubig para inig himolbulan. Ang mga lamas ready na pud kay lami daw kaayo ihigop sa sabaw," dugang ni Cabagnot.

Nasuta sa ilang imbestigasyon nga makadaghan na gikawatan og manok ang farm ug ubang manukan.Ang mga suspek niangkon nga makadaghan na usab sila mangawat og manok para ilaha ra nga isud-an.

Gigutom sila kay wa nay income kay wa makapamasahero sa traysikad tungod sa ECQ.

Ang duha ka mga menor de edad gi-turnover na sa kapulisan ngadto sa Department of Social Welfare and Development (DSWD).