3 KA PULIS GI-AMBUSH; 1 ANGOL
Tulo ka mga pulis nga nagpahigayon og surveillance sa giingong marijuana plantation sa bukirang dapit sa Dakbayan sa Toledo, kasikbit na nga lugar sa Siyudad sa Sugbo, nangaangol human sila gi-ambush sa gituohang marijuana planters.
Ang nakaangkon og mga samad pinusilan sa kilid sa lawas ug abaga mao si Police Master Sergeant Douglas Maravillas, lumad nga taga lungsod sa Asturias, sakop sa 1st Provincial Mobile Force Company sa Cebu Provincial Police Office.
Ang tulo nanaglakaw sa Barangay Pangamihan, dakbayan sa Toledo alas 8:30 Lunes sa gabii, Abril 27, 2020 dihang gipamusil.
Matod ni Police Lieutenant Colonel Rene Kyamko, hepe sa PMFC, nga wa pa matino unsa nga kalibre sa armas ang gigamit sa pagpamusil.
Apan sigun sa pamahayag sa iyang mga sako, rapid ang pagpabuto sa armas hinungdan nga sila nagtuong nigamit og
machine pistol ang gunman. Dugang ni Kyamko nga nakadawat silag kasayuran adunay marijuana plantation sa maong barangay hinugdan nga ilang gipanid-an.
“Nay info namo anang marijuana plantation sa lugar mao to nga atung gipa surveillance para maoy target sa atung operations,” matod ni Kyamko.
Apan pag-abot sa iyang mga sakop sa maong barangay, kalit lang sila nga gipamusil ug dayon nidagan sa wa matino nga direksyon ang gunman.
Si Police Colonel Roderick Mariano, hepe sa kapulisan sa probinsya sa Sugbo, nagkanayon nga aduna na silay gipangdudahan kinsa ang nagpusil sa iyang sakop.
Giingong nalambigit kini sa pagpananom sa marijuana sa Dakbayan sa toledo.
“Mayron tayong mga suspek doon. Actually may mga warrant ata na mga tao na yun. But ina-ano ko lang yung mga pangalan,” matod ni Mariano.
Gihulagway ni Mariano ang maong lugar nga hilit na nga bahin sa Barangay Pangamihan. Gani dili na kini masulod sa motorsiklo.
Tungod sa kalayo na sa lugar, nagpatabang na sila sa mga silingang police station sa dakbayan sa Sugbo aron madala sa tambalanan si Maravillas.
Ang Cebu City Mobile Force
Company sa pagpangulo ni Police Lieutenant Colonel Randy Korret niabag aron dalhon sa ubos nga bahin sa barangay si Maravillas. Gidala siya sa usa ka pribadong tambalanan sa dakbayan sa Sugbo.
Dugang ni Mariano lihitimo ang surveillance sa iyang sakop human sa impormasyon nga nadawat nga adunay marijuana plantation sa maong lugar.
“Yeah it is a legitimate operations na kinonduct ng ating 1st PMFC doon sa reported marijuana plantation,” sigun ni
Mariano.
Wala lang una mohatag og detalye si Mariano sa mga ngalan sa tulo ka mga gunman samtang nagpadayon sila sa ilang manhunt operation.
Tungod sa hitab, hepe sa Police Regional Office 7 Police
Brigadier General Albert Ignatius Ferro nipahimangno sa iyang mga sakop nga magbantay sa kanunay panahon sa ilang anti drug operations.
“Again, I will repeat that their personal safety should be a primordial concern. Physical security operational security should be the top priority of any operating unit,” matod ni Ferro. / AYB, GPL