MASSIVE TESTING SA CEBU CITY GIUSWAG SA MAYO 6

Dili madayon ang massive testing sa dakbayan sa Sugbo karong adlawa, Lunes, Mayo 4, ngadto sa 80 ka mga barangay isip lakang sa pakigbatok sa Covid-19.

Ang Department of Health (DOH) sa Central Visayas nipahibawo sa press conference bahin sa paglusad og massive testing sa tulo ka mga dakbayan sa Sugbo, Mandaue ug Lapu-Lapu.

Apan si Mayor Edgardo Labella ug DOH 7 Director Jaime Bernadas nagkasabot nga iuswag ngadto sa Miyerkules, Mayo 6, ang mass testing gumikan kay aduna pay mga preparasyon nga wala mahuman.

Ang mayor mopatawag sa 80 ka mga barangay karong alas 2:00 sa hapon sa City Hall aron ilang hisgutan ang mga pamaagi ug ubang gikinahanglan nga buhaton alang sa massive testing. Samtang, walay taho bahin sa pagkanselar sa laing duha ka mga dakbayan.

SEGURIDAD

Si Police Colonel Josefino Ligan, hepe sa Cebu City Police Office (CCPO), nipasalig nga hugot nga seguridad ang ipatuman atol sa mass rapid testing sa Covid-19 labi na sa proteksyon sa mga sakop sa Cebu City Health Department.

Dugang ni Colonel Ligan nga kon adunay mosukol o mosupak sa health workers nga mokuhag swab sample, ang pulis mahimong modakop sa maong tawo.

Niadtong Biyernes sa gabii, Mayo 1, sa barangay Sambag 2 sa siyudad sa Sugbo adunay usa ka lalake ang gipugos sa pagpahawa sa iyang balay human masuta nga nagpositibo siya sa Covid-19.

Tungod kay nagdumili kini sa pag-uban sa health workers, ang pulis niadto sa iyang balay aron pugson sa pagdala sa isolation area nga naa sa Cebu City Central Elementary School.

Miawhag usab siya sa mga tawo nga dili mohimog pagbugal-bugal o kaha pagtamay sa health workers nga frontliners sa krisis karon nga nasinati sa tibuok kalibutan tungod kay mahimo sila nga dakpon ug bilangguon.

ESKPERTO

Sa pagsugod na sa rapid mass testing sa tulo ka dagkong siyudad sa Sugbo, nipadayag ang mga eksperto sa suporta sa paggamit sa rapid antibody-based diagnostic test (RDT).

Kon gihulagway sa mga eksperto ang Real Time - Polymerase Chain Reaction (rtPCR) nga "gold

standard" niining pag-test sa Covid-16, ang RDT usa usab ka test diin sutaon ang antibodies nga anaa sa lawas sa tawo aron masuta kon na-expose na ang tawo sa aduna'y Covid.

Matod ni DOH 7 Chief Pathologist

Dr. Mary Jean Loreche nga kining RDT tumong niini nga masuta kon dunay nga immunoglobulin M (IgM) o immunoglobulin G (IgG) ang lawas sa tawo.

Kon makit-an kini, diha mahibaw-an nga na-expose na ang maong tawo sa infected sa maong virus, kasagaran naa niini kadtong wala'y sintomas.

"The rapid antibody test, on the other hand, as the name implies, aims to test for the antibodies, whose aim is to establish that a person has been exposed to an infected individual or is presently with the infection, without knowing it..." matod ni Loreche.

Si Regional Epidemiology and Surveillance Unit (RESU) 7 Epidemiologist Dr. Juanito Zuasola nagkanayon nga pinaagi sa maong rapid test, masuta kon kinahanglan pa ba ipaubos sa PCR ang kliyente o dili.

"The test results from both tools can now help further in addressing which group/class of persons will be placed in the isolation/ quarantine facilities,"

si Zuasola nagkanayon. Si Dr. Gerardo Aquino Jr., medical chief sa Vicente Sotto Memorial Medical Center, nibutyag nga ang rtPCR testing nagkinahanglan kini og igong oras, supply, mo-test niini, ug pasilidad nga kaya mo-test pinaagi sa mga makina o ekipo nga gamiton sa pagsuta sa maong testing.

Si Bernadas sa iyang bahin nagkanayon nga pinaagi sa maong massive testing, makadesider ang kagamhanan sa tulo ka siyudad kon mamahimo na ba nga ipaubos sa General Community Quarantine ang Sugbo o magpabilin sa Enhanced Community Quarantine.