2 MILUSOT SA BOHOL ‘NASIKOP’
TAGA-LABANGON SAKPAN SA INABANGGA NAG-PUMPBOAT GIKAN SA CORDOVA
Duha ka managsuon gikan sa Barangay Labangon, dakbayan sa Sugbo nga nakatabok sa lungsod sa Inabangga, Bohol sakay og pumpboat nga nanukad gikan sa lungsod sa Cordova, nasakpan sa awtoridad.
Si PSSgt. Junrey Opalla sa Inabangga Police Station nga nahinabi sa Superbalita Cebu, nagkanayon ang nasakpan milusot taliwala sa enhanced community quarantine (ECQ) mao sila si Maria Jonaly Bautista, 33, ug Jack Virgil, 30, lumad sa Barangay Fatima, Inabangga, apan nanarbaho sa Sugbo.
Sa imbestigasyon sa Inabangga Police Station, nasayran nga Biyernes, Mayo 1, pa miabot ang managsuon alas 11:00 sa gabii apan gi-report sa kapulisan sa pagka Sabado, Mayo 2, pasado alas 12 sa udto.
Dihang nasayran sa awtoridad, dali kining giadto sa ilang dapit ug gipaubos sa 14 ka adlaw nga pagkwarentina sa wala pa ipailawom sa swab test sa pagseguro nga wa kini magdala og virus sa Covid-19.
Gikabalak-an sa awtoridad sa Inabangga tungod sa daghang kaso sa Covid-19 sa ilang gipuyan sa dakbayan sa Sugbo.
Nasuta nga ang duha mipugos sa paglawig gikan sa Cordova sa isla sa Mactan sa lalawigan sa Sugbo padung sa Inabangga sakay sa pumpboat.
Si Bautista giingong usa ka project manager sa retail store sa usa ka dakong mall dinhi sa dakbayan ug ang iyang manghod gwardiya sa usa ka tindahan sa dakbayan.
Matod sa managsuon, nipugos sila sa pag-uli sa ilang dapit sa Bohol aron didto magpundo sa lockdown bisan nasayod sila nga ang Philippine Coast Guard mipatuman sa 'no sail policy.'
Tungod sa pagkadiskobre sa duha, ang barangay kon diin nanimuyo ang ilang ginikanan, mimando usab nga ibutang ang duha sa usa ka lawak ug ipaubos sa kuwarentina.
Samtang ang pamilya usab sa managsuon gibutangan na og kordon ug dili na pagawason sa ilang panimalay.
Dugang ni Opalla nga ang duha wala giaresto apan pasakaan gihapon og kasong kalapasan sa Republic Act (RA) 11332 ug 9271 ug Article 151 sa Revised Penal Code.
Ang mayor sa maong lungsod hugot nga nimando sa kapulisan sa Inabangga sa pag-monitor niining mga tawo kon kinsa man gali ang nakasulod sa ilang lugar.