DOH: Dili mabalaka kon dili mag-ilis og gloves

Walay angay kabalak-an ang residente sa tulo ka mga dagkong siyudad sa Metro Cebu atol sa pagsugod sa mass testing sa matag barangay.

Mao kini ang pasalig ni Department of Health (DOH) 7 regional director Dr. Jaime Bernadas.

Matod ni Bernadas, ang himuong mass testing karong Lunes, blood extraction kini o kining pagkuha og dugo sa usa ka indibidwal sa matag panimalay tungod kay rapid antibody-based diagnostic test (RDT) testing ang himuon sa tulo ka siyudad.

Atol sa paglusad sa Project Balik Buhay (PBB) niadtong Miyerkules, Abril 28, gibutyag ni Cebu City Councilor Raymond Garcia nga random ang pagahimuon nga mass testing sa 10% sa kinatibuk-an nga gidaghanon sa panimalay sa matag barangay sa dakbayan.

Si Bernadas nipasabot nga ang magsul-ob og protective gears ang 33 ka extraction team nga motuyok sa mga panimalay sa matag barangay aron mokuha kini og dugo sa usa ka miyembro sa panimalay.

"Teams can include trained personnel including medical doctors, medical technologists, nurses, barangay health workers (BHW), barangay health emergency response team (BHERT) and trained community leaders," tipik sa Standard Operating Procedure sa DOH 7 kabahin sa Personnel and Blood Extraction Team nga mohimo sa mass testing.

Nasayran nga lain-lain ang hiringgilya ang gamiton aron masiguro ang kaluwasan sa matag indibidwal nga kuhaan sa dugo.

Base usab sa SOP sa DOH 7, mamahimong magamit ang gloves nga anaa sa maayong kondisyon sa lima ka mga kliyente. "Good condition gloves can be used up to 5 clients and should be sanitized with 70% alcohol every after client. If gloves capture splatters change it with a new set immediately."

Aduna'y sumatotal 46,896 ka mga indibidwal ang ipaubos sa mass testing sa Cebu City, Mandaue City, ug LapuLapu City isip parte sa lakang sa tulo ka dagkong siyudad inabagan sa Office of the Presidential Assistant for the Visayas, DOH 7, ug pribado nga sektor, nga matino kon mamahimo nang ipaubos sa General Community Quarantine ang Sugbo o dili.

Usa ang Sugbo sa Visayas nga gipaubos sa ECQ inubanan sa Bacolod ug Iloilo.

Nagpabilin nga nagsaka ang kaso sa Covid-19 sa Sugbo tungod sa maong mass testing nga gihimo.