MCWD tubig tawon

Gikinahanglan kaayo ning panahona ang igong supply sa tubig taliwala sa hugot nga kampanya sa kagamhanan sa kalimpiyo sa panglawas ug palibot isip usa sa mga nag-unang pamaagi sa pagsanta sa coronavirus disease 2019 (Covid-19). Mag-unsa man ang sabon kon walay tubig? Ang atong panawagan sa Metro Cebu Water District (MCWD), nag-unang tinubdan sa tubig sa publiko, nga tubig intawon. Ang ilang kooperasyon sa kampanya batok sa Covid-19 gikinahanglan kaayo. Igo lang nisaad niadto nga dunay diskwento sa balayrunon. Ang tubig mismo maoy importante.

Pwerte, makasapot ang agas sa tubig sa MCWD. Dili pa kanunay ug usahay murag ihi lang sa bata ang agas sa gripo bisan sa ubos nga dapit sa dakbayan sa Sugbo. Unsa na kaha sa mas taas o bukirang dapit?

Lahi sa nangaging liderato, daling mopasabot sa sitwasyon ug mohatag og alternatibo. Karon, hilom murag wala lang. Nasayod kita nga bag-o ang lideratro sa MCWD apan dili kini igong rason nga nagmika ang ilang reaksiyon. Di ba gisaway pag-ayo ang kanhi mga opisyal. Murag way kalahian.

Dunay basihanan ang reklamo ni Labangon Barangay Capt. Victor Buendia nga nipadayag og kasagmuyo sa MCWD nga wa dayon motubag sa ilang hangyo alang sa linya sa tubig sa Labangon Elementary School diin dunay mga lawak nga gihimong isolation rooms ug gipuy-an karon sa dili mominos 115 ka mga pasyente sa Covid-16.

Matod ni Buendia, may linya naman unta daan sa tubig sa MCWD apan ang mga kawani na lang sa barangay mao ang naghimo og diskarte aron makasaka ang tubig sa pansayan sa taas sa tunghaan sa miaging semana.

Manghinaut kita nga matandog ang mga bag-ong opisyal sa MCWD nga mahimong pro-active ang ahensiya. Nasayod kita nga pipila kanila naila sa ilang kaligdong mobarog unta, pwera sa nabaniog nga sinyalan na.