Paglibkas sa liquor ban

Morag bisibis sa mabugnaw nga uwan taliwala sa naglagiting nga kainit sa adlaw sa usa ka hataas nga huwaw ang paglibkas sa liquor ban nga gipatuman dinhi sa siyudad sa Sugbo nunot sa Covid-19. Ang Executive Order No. 73 nga giluwatan ni Cebu City Mayor Edgardo Labella nagtapos niadtong Abril 28 sa 42 ka adlaw nga puasa ug nagdalag alibyo sa naughan nga tutonlan sa mga palainom.

Ang Section 4 niini nagkanayon, "A total liquor ban in all public places is hereby imposed within the City of Cebu. As such, it shall be prohibited for any person to drink in any public place within the City of Cebu during the entire period of the enhanced community quarantine."

Naa diay gihapon ang liquor ban. Pero ang gidili ning higayona mao ang pag-inom sa ilimnong makahubog sa mga pangpublikong lugar. Wa na idili ang pagbaligya. Wa na idili ang pagpalit. Apan adto imnon sa balay, matod pa ni Atty. Floro Casas Jr., ang Cebu City administrator.

○○○

Dunay nabalaka nga ang paglibkas sa liquor ban mosangpot sa pagsaka sa domestic violence. Apan dunay balaod nga nagprotihir sa kababayen-an ug kabataan gikan sa bisan unsang matang sa abuso. Mahimo silang modangop sa ilang barangay, sa kapulisan ug sa mga hukmanan.

Lahi kon ang bana maoy biktima. Sama niadtong bana nga nisukmat sa iyang asawa, "Darling, dako na kaayo tag gasto. Sigi man lang ka sa parlor." Tubag sa asawa, "Da, para gud gwapa ko pirmi. Para nimo ni. Ikaw bitaw, sigi lang kag inom." Ingon sa bana, "Sigi kong inom para gwapa ka tan-awon." Wa pa maayo ang mga bun-og sa bana.

Sa pag-imponer gyud sa liquor ban, ang mga palainom ingon dayon nga ang labing unang milagro ni Kristo mao ang paghimo sa tubig ngadto sa bino. Sagbat sa taga Cabadiangan, kon gidili pa ang bino, ang tubig gihimo unta nga mango juice.

○○○

Si Police Col. Josefino Ligan, hepe sa Cebu City Police Office, nipasidaan sa katawhan sa dili pag-inom sa mga pangpublikong lugar. Adto lang inom sa balay. Kon mahubog gani, ayaw nag gawas sa balay. Kon mogawas gyud, dakpon ug prisuhon.