Remember me

Samtang naghunahuna ko sa akong sitwasyon karon, nahinumdoman nako ang akong gipangbuhat ug maong natakdan ko sa coronavirus. Tungod sa akong kahiubos kang Rene nga kalit lang nga naglikay nako, kanunay kong nakigkuyog sa akong mga amiga sa pagpanuroy sa bisan asang lugar sa siyudad. Gihilom namo kini tungod kay Enhanced Community Quarantine man sa siyudad.

Gani, hilom sab ming magdisko

sa balay sa usa nako ka barkada. Wa namo sunda ang social distancing.

Ug uwahi na dihang nahibaw-an nako nga duna na koy Covid-19. Sa sinugdanan giubo ko, anang ubo nga morag nag-uga lang ug kanunay nga magsakit ang akong tutunlan, gisundan kini og sip-on. Ug wa madugay gihilantan na ko. Wa na koy ganang mokaon ug kapoy ang akong lawas.

Nakapanghupaw ko samtang naghunahuna aning tanan. Magbasol man ko apan unsa pa may kapuslanan ani? Nataptan na ko sa makamatay nga kagaw.

Sa akong paminaw karon sa gipamati ko sa akong lawas, oras na lang, o kaha minuto na lang, o kaha segundo na lang, mobiya na ko sa dayon dinhi sa kalibotan.

“Kumusta ang iyang sitwasyon karon. Doktora?”

Nagpiyong man tuod ang akong mga mata apan nadungog ko ang pagpangutana sa frontliner nga nag-atiman nako ngadto sa doktora nga maoy nagtambal nako.

“Way kausaban. Luya gihapon ang iyang immune system. Siya ra sab ang makatabang sa iyang kaugalingon. Nakahibawo na ta nga wa pay tambal nga sakto gyud aning Covid-19. Kinahanglang magmalig-on siya ug kanunay mag-ampo sa Diyos.”

Wa ko na madungog ang tingog sa doktora. Gibuka ko ang akong mga mata. Ang frontliner nga nag-asikaso nako nagtindog sa kilid sa gihigdaan kong kama, gitan-aw ko niya pag-ayo. Seguradong naluoy siya nako.

Unya migawas siya sa nahimutangan kong isolation room.

Anang pagka gabii, naigking ko sa pagtawag sa akong ngalan. Di ko makita ang nawong sa nagtawag nako. Hinuon usa ka bugnaw nga kahayag ang akong nakita.

“Laila, panahon na nga kuhaon tika. Apan sa di pa kini mahitabo, pangayog pasaylo sa tanan mong mga sala pinaagi sa pagsangpit sa Diyos.”

Unya nawala ang kahayag. Mihilak ko. Ug kalit kong nakamata. Nagdamgo lang diay ko. (SUMPAYAN)