Taiheiyo, Solid Earth mibag-o sa ilang pasalig
Gibag-o ug mas gipalig-on sa duha ka mga kaalyadong kompaniya sa minahan ang ilang pasalig sa 13 ka mga barangay sa lungsod sa San Fernando, Cebu nga nasakop sa ilang operasyon alang sa malungtarong programa, proyekto ug kalihukan karong 2020.
Ang pabrika sa semento nga Taiheiyo Cement Phils., Inc. (TCPI) ug ang iyang igsangkap og minerales nga Solid Earth Development Corp. (SEDC) naghiusa sa pagkonsulta sa komunidad ug akademiya dili pa lang dugay nga panagtigom sa TCPI conference hall.
Ang resulta sa naasoy nga panagtigom nahimong kabahin sa Social Development Management Programs (SDMP) sa duha ka mga kompaniya sama sa mga nanglabay na nga katuigan.
"Magdala sa malungtarong kaugmaran sa atong mga komunidad,” matod ni community relations officer Gines T. Boltron.
Gibuksan nila ni Chiyuki Sugawara, tagduma sa planta sa TCPI ug senior vice president for operations, ug Atty. Dennis Tenefrancia, pangulo sa SEDC, ang Annual Stakeholders Meeting, mipahimutang sa tuno sa ilang panaad nga motukod og labing maayo nga mga komunidad.
Susama sa iyang gihimo, gipahibalo sa iyang katugbang sa TCPI nga si Vanessa N. Bongcawil ang mga gisugyot nga plans, programs and activities (PPA) sa 2020 nga gidawat ug giuyonan sa mga mitambong nga tinugyanan sa mga hingtungdan.
“Mihangyo lang ang mga taga-akademya og mga kagamitan sa pagpananom atol sa Brigada Eskwela,” sa dili pa magsugod ang 2020-2021 nga tuig tigtungha karong Hunyo, mibutyag si Mitzie Almira I. Carin, tagduma sa SEDC HRA division.
PAGPAUSBAW
Mitambong alang kang Mayor Lakambini Reluya sa San Fernando, gidayeg ni Neil L. Papas, ang municipal administrator, ang TCPI ug SEDC sa ilang mga paningkamot, samtang giambit niya ang iyang kasinatian sa SDMP sa Grand Cement Manufacturing Corp. sa wala pa kini mabaton sa TCPI.
Katuyoan sa Philippine Mining Act of 1995 nga gahinan sa mga kompanyang minahan ang mga programa ug proyekto alang sa pagpausbaw sa kinabuhi sa mga komunidad asa sila namatigayon.
Subay niini, napatuman sa duha ka mga kompanya ang ilang masigka-PPA, buot ipadayon ang pipila niini, ug sugdan ang mga bag-ong inisyatiba ubos sa human resource development and institutional building, ug ingon man enterprise development and networking.
Ang uban gihan-ay ubos sa assistance to infrastructure development and support service, access to education and educational support, ug access to health services, facilities and professionals.
Adunay mga PPA alang sa protection and respect of socio-cultural values, development of mining technology and geosciences, ug implementation of information, education and communication activities.
Lakip sa dakong epekto nga nabuhat sa TCPI ug SEDC ngadto sa mga tagilungsod naglakip sa medical missions, pagpananom og mga kahoy, ug pagpanglimpyo sa mga sapa ug baybayon, lakip sa service bus sa tiinun-an sa hayskul ug kolehiyo.
COVID-19
Samtang, padayong gipa-ugmad sa SEDC ang SEDC-St. Augustine Eco-Pilgrimage Park didto sa Magsico, ug ang pagpamuhi’g baboy sa Tonggo.
Mihatag sab kini og luna nga natukoran na ron sa Cabatbatan health station, ug laing luna alang sa South Poblacion multi-purpose building, samtang napasemento ang mga karsada sa Tonggo, Magsico ug Bugho, ug napalambo ang North Poblacion barangay hall ug Panadtaran day care center.
Alang ni’ng tuiga sa 2020, sugdan sa duha ka kompanya sa Tonggo ang skills development training alang sa kabataan, ipaila sa Ylaya ang inland fishery ug ingon man organic farming sa Magsico ug Bugho, ug moabag sa pagtukod sa usa ka dog-impounding facility sa Magsico.
Subling gipanaad nilang Bongcawil ug Carin ang gipamasalig nila bisan sa pagkalangay sa pagpatuman sa pipila sa dihang gipatuman sa kagamhanan ang enhanced community quarantine (ECQ) aron mapugngan ang pagkuyanap sa gika-intapang Coronavirus disease 2019 (Covid-19). /