Pagpanalipod sa mga bata panahon sa ECQ

Nagpadayon gihapon ang pagsaka sa kaso sa Covid-19 bisan pa man sa mga gipatuman nga mga lakang sa gobyerno aron mamenosan ang tawo nga matakdan sa virus.

Sa pagsuwat niining lindog niadtong Lunes, Mayo 4, miabot na og 1,081 ka mga kaso sa Covid-19 ang natala sa Central Visayas (CV).

Ang lalawigan sa Sugbo ug mga dakbayan sa Lapu-Lapu, Mandaue, ug Cebu maoy duna’y labing daghang kaso sa maong sakit nga anaa sa 958.

Tungod niini, gilugywayan ang pagpatuman sa enhanced community quarantine (ECQ) nga maoy nakitang solusyon aron masulbad ang krisis.

Subay sa maong mando, ginadili ang paggawas sa mga panimalay, nahunong ang pagpanrabaho sa kadaghanan, ug gilikayan ang mga kalihukan kon diin magpundok ang mga tao.

Usa ang lokal nga kagamhanan sa Cebu City sa nagpatuman niini kon diin ilang gi-extend ang ECQ hangtod Mayo 15.

Sulod sa kapin usa ka buwan nga gipatuman ang ECQ, nasayran nato sa mga balita gikan sa media ug mga non-government organizations (NGO) nga dunay mga kalapasan nga nabuhat ang mga awtoridad lakip na ang kapulisan sa ilang tinguha nga madisiplina ang katawhan.

Angay nga magmatngon kitang tanan sa pag-abusar sa gahom, lakip na niini ang paglikay nga mahimong biktima ang mga bata sa pagpangabuso.

Sa atong lindog karong semana, hisgutan nato ang mando isip pagpanalipod sa mga bata nga gipakanaog sa duha ka ahensya sa gobyerno: ang Department of the Interior and Local Government (DILG) ug ang Council for the Welfare of Children (CWC).

Subay sa ilang Joint Memorandum Circular No. 2020001 niadtong April 6, 2020, ilang gipahinumduman ang mga nagdumala sa mga lokal nga kagamhanan ug uban pang mga ahensya sa gobyerno nga dunay gilatid sa mga balaod ug regulasyon bahin sa pagresolba sa mga sitwasyon nga naglambigit ug mga bata.

Lakip sa maong mga regulasyon mao ang Protocol for Case Management of Child Victims of Abuse, Neglect, and Exploitation, ang Protocol to Reach Out to Street Children, ug ang Manual in Handling Cases of Children at Risk and Children in Conflict with the Law.

Sulod sa mga oras nga ipatuman ang curfew ordinance, gipahinumdoman ang awtoridad nga dili masilotan ang mga bata kon makahimo og kalapasan.

Angay nga masayran nga gihimo ang maong ordinansa tungod kay gitinguha nga mapanalipdan ang bata.

Matod pa sa DILG ug CWC, ang saktong buhaton mao nga dad-on ang mga bata sa ilang panimalay o ngadto sa barangay nga maoy muhatod sa bata sa iyang ginikanan.

Dugang pahinumdom sa otoridad nga maninguha sila sa pag-contact sa ginikanan sa bata o social worker kon duna sila’y mga dinakpang bata.

Giawhag sa duha ka ahensya nga dili ibutang sa risgo ang mga bata ug likayan ang pag-discriminate nila.

Angay sab nga mogamit og child and gender-sensitive nga mga pulong kon makighinabi kanila.

Hatagan sab og konsiderasyon ang mga bata nga mugawas sa ilang mga panimay kon medical-related kini.

Nagpamatuod lang ang joint memorandum circular sa DILG ug CWC nga dunay mga proseso nga angay sundon aron mapanalipdan ang mga katungod sa mga bata bisan pa man sa striktong pagpatuman sa ECQ.

Kon duna tay igong kaalam sa maong mga regulasyon, malikayan nato ang mga higayon nga mabiktima ang mga bata sa pagpangabuso.

Magtinabangay kitang tanan aron mahimong malipayon ang kinabuhi pa sa mga bata taliwa sa kalisdanan sa pagsiaw sa Covid-19.

[Mahimong mopadangat sa inyong mga suliran o pagsumbong sa kaso sa pagpangabuso pinaagi sa pagemail (clbphilscebu@gmail. com) o pag-send og mensahe sa among Facebook page nga “Children’s Legal Bureau” m.me/ChildrensLegalBureauInc (Messenger)]