Mandaue andam na sa rapid mass testing

Giandam na ang quarantine facility sa Mandaue City Central School sa wala pa ang unang adlaw sa paghigayon sa rapid testing karong adlawa, Miyerkules Mayo 6,2020.

Moabot ngadto sa 1,700 ka mga pasyente ang mapahiluna sa maong pasilidad.

Nagpahigayon sa ilang simulation si Mandaue City Councilor Nerissa Soon-Ruiz, ang pangulo sa Committee on Health, ug si Atty. John Eddu Ibañez, ang executive secretary ni Mayor Jonas Cortes.

Ang maong facility aduna nay gi-install nga negative air pressure aron paglikay sa cross-contamination.

Aduna kini exhaust fan nga maoy mosuyop sa hangin nga anaa sa sulod sa facility ug i-filter kini aron dili kontaminado nga hangin ang mogawas.

Aduna sab kini gi-install nga alarm bell system aron kung adunay kinahanglang ang mga pasyente ila lang pisliton ug ang mga nurse na ang mo-adto sa ilang ward.

Sigon ni Ruiz nga andam nasad ang mga nurse ug ubang staff nga mu-duty sa maong pasilidad.

Aduna na silay 12 ka mga nurse nga mag-station sa maong pasilidad alang sa unang 100 ka mga pasyente nga ihiluna sa maong pasilidad.

"We are ready," matod ni Ruiz. Ang tumong sa maong pasilidad alang sa masuta nga mag-positibo sa coronavirus disease (Covid-19) sa panahon nga sugdan na ang mass testing.

Ang proseso niini human sa mass testing kung nagpositibo kini sa Immunoglobulin M (IGM), ipaubos dayon kini sa swab testing.

Samtang nagpaabot sa resulta, ibutang ang maong pasyente sa holding area, ang building nga anaa dapit sa second gate sa Mandaue City Central School (MCCS).

Kung masuta nga positibo kini sa Covid-19, ibutang na kini sa ilang quarantine wards.

Ang adunay simtomas nga mild ngadto sa moderate ibutang sa Gabaldon building sa MCCS.

Ang mga walay simtomas, ibutang sa building nga anaa sa isig kakilid sa Gabaldon building. Tibuok nga building sa MCCS ang gigamit isip quarantine facility.

"Ang among gipaabot naLang karon ang mga CCTV monitoring," sigon ni Ruiz.

Aron dili sige ang contact sa mga nurse ug sa pasyente, sigon ni Ruiz nga sa stage sa MCCS magbutang og thermometer sa lamisa.

Ang mga pasyente na ang mo-take sa ilang body temperature ug ipakita lang sa CCTV nga i-install. Lakip sa mibisita sa maong pasilidad ang mga nurse nga mo-duty sa maong pasilidad.