PBA dili katuman sa social distancing: Marcial

Gitataw ni Philippine Basketball Association (PBA) Commissioner Willie Marcial nga ilang huwaton ug tumanon ang mga kamanduan sa gobiyerno kabahin sa ilang intensyon nga ibalik na ang mga duwa sa liga.

Nagkanayon si Marcial nga nakasabot siya sa pamahayag ni Health Undersecretary Maria Rosario Vergeire ning bag-uhay lang ug siya mismo, dili mosugal sa kaluwasan sa mga magduduwa, sa fans ug ubang mga nahilambigit sa liga.

"Malungkot. But that's the reality, mahirap ibalik agad ang sports because, for one, there's the social distancing issue to be followed," pasabot ni Marcial sa www.pba.ph.

"One can say our players are strong enough to be hit by COVID-19. Yes, pwedeng kaya ng mga malalakas ang katawan, pero paano paguwi nila sa bahay at daladala nila ang virus, baka ang pamilya nila ang tamaan. And that's a big, big concern."

Ang Inter-Agency Task Force daan nang miingon nga dili pa tugtan ang mga kalihukan nga makahakot og daghang mga tawo sama sa PBA bisan ipaubos na ang enhanced community quarantine ngadto sa general community quarantine.

Si Philippine Sports Commissioner chairman William "Butch" Ramirez misugyot nga tugtan na ang pagpahigayon og individual sports sa higayon nga ilibkas na ang quarantine period.

Apan giklaro ni Vergeire nga dili tanang individual sports ang tugtan.

Mao kini ang hinungdan nga dili gihapon ibalik sa PBA ang ilang mga duwa bisan dili pa kini patanawan og mga tawo sulod sa venue.

"Kahit ang double-header natin eh nag-draw ng mass gathering," pasabot ni Marcial.

Gitataw ni Marcial nga posibleng sa Agusto pa sila mobuhi og pinal nga desisyon kon unsay angayan nilang buhaton.

Adunay posibilidad nga himuon na lang nga usa ka komperensya ang 45th season imbes nga tulo.

Apan giangkon ni Marcial nga posible sab nga hingpit na lang nilang kanselahon ang tibuok season depende sa sitwasyon.