TAG 15 NA LANG KA MGA TINUN-AN MATAG CLASSROOM

Kinse na lang ka mga tinunan ang tugotan sa pagsulod sa usa ka classroom sa mga tunghaan sa lalawigan sa Sugbo.

Mao na kini ang usa sa mga mga lagda nga giumol sa Task Force New Normal (TFNN) sa bag-o o new normal nga pagbukas na unya sa mga klase.

Atol sa tigom sa task force, gi-indorso ni Department of Education (DepEd) 7 Regional Director Salustiano Jimenez ang continuity plan sa buhatan nga maoy basehan sa pagpahigayon og klase taliwa sa coronavirus disease (Covid-19).

Nalatid sa plano nga 15 na lang ka mga tinun-an ang makasulod sa lawak-saringan.

Kini aron mapatuman ang istrikto ngà physical distancing. Mag puli-puli usab sa skedyul ang mga tinun-an sa pagsulod sa klase. May mga tinun-an nga mosulod sa Lunes, Miyerkules ug Biyernes. Aduna usab mo sulod sa Martes ug Huwebes.

Si Dr. Marilyn Andales, provincial schools division superintendent, nagkanayon nga ilang sutaon ang mga tunghaan nga mamahimo nang magamit sa mga tinun-an. Dunay mga tunghaang padayon pa nga gigamit isip isolation centers ug quarantine facility sa mga local government unit (LGU).

Nipasalig ang DepEd Province nga paningkamotan nga makat-unan na sa mga magtutudlo ang bag-ong normal nga pamaagi sa di pa mobukas ang klase sa Agusto 24.

Sa ilang bahin, ang Commission on Higher Education (Ched) mopatuman usab og flexible learning system pinaagi sa online ug offline nga klase.

Kini aron nga padayon gihapon nga makakat-on àng mga tinun-an bisan pa man og anaa sa balay. Nipahigayon og laing konsultasyon ang TFNN aron mahibaw-an kon unsa nga pamaagi ang gamiton sa mga tunghaan sa lalawigan.

Ilabi na nga may mga tunghaan nga nahimutang sa bukiran nga bahin og wala'y kapasidad nga makatuman sa online class.