Dole 7 mipinalisar sa listahan sa ilang hatagan og hinabang

Giandan na karon sa Department of Labor and Employment (Dole) 7 ang pinal nga listahan sa mga nahatagan na og ayuda ubos sa Covid-19 adjustment measures program (Camp) sa Central Visayas aron isumiter kini sa Department of Finance (DoF).

Matod ni Dole 7 regional director Salome Siaton nga tanang regional offices sa Dole kinahanglang mosumiter sa ilang lista sa nahatagan sa ayuda nga P6,000 pinaagi sa Camp aron mapasa na kini sa DoF alang sa small business wage subsidy (SBWS) program niini.

Ubos sa SBWS, ang kwalipikadong benepisyaryo nga trabahante sa Central Visayas makadawat kini og subsidiya nga

P6,000 sulod sa duha ka buwan.

Abag kini sa Dole sa mga mamumuo sa mga gagmayng kompaniya nga nihumong sa ilang operasyon tungod sa pagpatuman sa enhanced community quarantine (ECQ).

Dugang ni Siaton nga alang sa rehiyon, nakadawat ang ilang ahensiya og sumada nga P158,090,000 alang sa Camp nga nagamit sukad nagsugod sa pagdawat sa aplikasyon hangtod natapos niadtong Abril 30.

“This amount has already been depleted. Yes, it was not able to accommodate all the affected workers in Region. That’s the sad truth and the primary limitation that had been confronting us in our implementation of the program is limited funds,” si Siaton nagkanayon.

Ang sumada nga 31,618 ka kawani ang nakapahimulos niini sa 1,403 ka kompaniya lukop rehiyon.

Alang sa mga kompaniya nga nisumiter usab sa Camp apan wala malakip sa nahatagan, mahimo kining mo-apply sa SBWS sa DoF.

Mahimong mobisita sa website sa DoF alang sa dugang detalye kabahin sa unsaon pagkuha sa maong ayuda.

Ang mga employer mahimong mo-apply online sa Social Security Sysrem (SSS) portal.

Niadtong Abril 15 gihunong sa Dole ang tanang aplikasyon sa Camp tungod sa kalimitado sa pundo niini.