Fake news sa City Hall

Nisamot og kahibat ang pagtan-aw sa mga tawo niining pagdumala sa administrasyon ni Mayor Edgar Labella sa siyudad sa Sugbo kalabot sa pagtubag ning krisis nga gidala karon sa Covid-19. Kini human masuta nga dili diay tinuod ang gi-anunsiyo ni City Administrator Floro Casas nga 100 ka mga Covid-19 patients sa Barangay Luz nga gikan sa isolation center ang ipang-release na human kini maka-recover.

Ang mga officials sa Barangay Luz mitino nga way bisan usa sa mga pasyente ang ipang-release kay sila gani mismo wa sultihi niiini sa Department of Health ug sa City Health.

Sa niaging adlaw pa diay sugdi ang swab testing sa first batch nga gipang-isolate. Human niini, paabuton pa og pila ka adlaw ang resulta ug moagi pa usab og taas nga proseso una pa i-release.

Sa dihang gikuhaan sa iyang habig, daling mitumbok si Casas ngadto sa City Health Department nga maoy naghatag kaniya sa information.

Unsa kahay katuyoan ni Casas nga dali man usab dayon siyang nakasabwag niini ngadto sa publiko nga wa klaroha kon unsa kini ka tinuod.

Kon dili ni fake news ambot og unsa ni nga nakapaalarma man usab kini sa publiko ilabi na ngadto sa mga pamilya ug mg silingan sa maong barangay.

Sa samang higayon, makapaubos kini sa integridad sa administrasyon kansang tahas mao unta ang paggiya sa mga tawo kon unsay tinuod nga panghitabo taliwala ning dakong hudlat sa atong kinabuhi.

Dili lang unta kutob sa imbestigasyon kon dili mapahamtangan sa mayor og silot ang mga iresponsabli kay tingali og magduda na hinuon ang mga tawo sa ilang ipang-anunsyo.

Kinsa ug pila man gyud ka mga tawo ang gitugotan ni Labella nga magsilbing tigpahibawo sa publiko? Mao ni usa sa mga nakayabag karon diha.