Naglatay sa lugas sa lanot
Gihan-okan sa pagbasol si DOH Sec. Francisco Duque sa pagsulod sa Covid-19 nga nakatay-og sa nasod. Resolusyon sa 16 ka senador nanawagan kang Duque nga moluwat sa katungdanan ug pit-on sa imbestigasyon sa kapakyas sa liderato, nahisalaag sa mga palisiya, kalangay pagtubag sa krisis, walay tino nga sistema sa travel restrictions, contact tracing ug mass testing nga miabot ang punto nga nag-una ang Pilipinas sa Southeast Asia sa mga natakdan.
Maong naglatay sa lugas lanot ang gihuptang katungdanan. Sa sayo pa si Duque gisabonan sa senado human mitago sa tinuod nga inpormasyon ug napakyas pagsuhid sa mga nahakuyog sa biyahe sa tulo ka mga Insek nga konpirmadong positibo sa nasod, usa ang patay. Unta ang himuon sa mga senador ang himsog nga suhestyon kay dili maayo nga hulipan ang nangulo taliwala sa makalisang nga gubat nga walay kontra nga makita.
Apan ang NEDA Chief ug Socio Economic Planning Sec. Ernesto Pernia kalit nga miluwat. Nagkasumpaki sa pilosopiya sa kalamboan tali sa ubang opisyal sa kabinete. Gimud-an sab sa nalangay nga implementasyon sa national ID system nga maghatag untag kasayon sa pagpadangat sa hinabang sanglit walay kongkretong database ang DSWD ug LGU.
Si Pernia uyon sa sugyot sa PCCI ug DOLE sa anam-anam nga paglibkas sa Enhanced
Community Quarantine (ECQ) o lockdown aron dili malukapa ang ekonomiya. Basi sa siyensya ug makuting pagtuon sa dagan sa panghitabo pinaagi sa rekomendasyon sa Inter-Agency Task Force gilugwayan ni Pres. Rodrigo Duterte ang ECQ sa Mayo 15 sa Metro Manila o NCR, Quezon o Calabarzon, Bataan, Bulacan, Nueva Ecija, Pampanga, Batangas, Cavite, Laguna, Rizal, Mindoro, Albay, Catanduanes, Aklan, Capiz, Benguet, Pangasinan, Baguio, Iloilo, Davao ug Cebu.
Sa lugar nga dili taas ang risgo giubos sa General Community Quarantine (GCQ) nga maoy bag-ong normal sugod sa Mayo 1. Sa GCQ buksan ang malls, shopping centers, constructions, public transportations, airport ug seaport cargos, hotels, dormitories, barber shops, saloons, night time curfew sa non-workers, high school ug higher education nunot sa pagtuman sa mga protocols ug guidelines. Gidili gihapon ang tapok-tapok.
WHO Dir-Gen Tedros Adhanom Ghebreyesus miabiso nga dili madali ang hingpit nga pagwaling sa ECQ. Iyang prinsipyo, “the faster all cases are found, tested, isolated and cared for the harder we make it for the virus to spread”. Ilibkas lamang kon makontrolar na sa health system, epiktibong panagang ug sangkap ang komunidad sa kabaghoan. Gipanghinaot nga molurang ang unos nga gidalit sa Covid-19.