Mobangon ta!

Sa kadaghan sa mga pagsulay nga atong naagian karon ang pinakalisod nga bahin mao ang pagbangon. Kalit o inanay man ang pagkalup-og ang labing importante mao ang determinasyon sa pagbangon.

Bisan kong nagkagidlay tungod sa naghingapin nga panaugdaug, abuso o santako gikan sa mapintas nga katalagman, motuyhakaw ug maningkamot nga makabangon. Makadaghan na nato ni pamatud-i taliwala sa kabangis sa mga katalagman nga niigo dinhi sa ato.

Pananglit ang atong pagbangon human kita dabudabuhi sa bagyong Ruping ug Yolanda. Gipabilib nato ang tibuok kalibutan sa talagsaon natong determinasyon pagsungasong sa epekto di lang sa duha ka makalilisang nga bagyo apil na ang pinakakusog nga linog sa atong kasaysayan niadtong 2013.

Sayo ning semanaha daw gilinog ug gibagyo ang akong mga kaubanan sa ABS CBN human gipaundang sa National Telecommunications Commission ang iyang operasyon. Nahitabo ni niadtong Mayo 5. Tibuok gabii nga wa koy maayong kinatulgan sa pagsigi og hunahuna sa hitabo ug pagpangita og klarong tubag sa pangutana nganong nahitabo kini ning panahon nga ang Pilipinas ug tibuok kalibutan nakiggubat sa usa ka makalilisang nga kaaway nga dili makita.

Nganong pagngan sa signal ang usa sa maisip nato nga frontliner ning maong gubat.

Di ba mga frontliner man sab ang mga reporter nga nisugal sa ilang panglawas paghipos sa pinakauwahing kaugmaran labot sa gikahadlokan nga coronavirus disease? Inay mangahas pagtimang sa puntong legal nga maoy sagad gihimo sa uban, pagka ugma pinaagi sa akong Facebook akong gipasalamatan ang tanan nga akong na-interview sud sa subra sa 28 ka tuig nakong pangalagad sa ABS CBN.

Lakip nga akong gipasalamatan ang publiko nga nagsunod sa akong mga report pinaagi sa TV Patrol Central Visayas. Sa comment section makahatag og kadasig ang mga positibong komento. Pero makapaguol sab ang mga komento nga nagpasangil sa sibyaanan nga maoy sad-an sa kalit nga kamanduan sa NTC.

Wala ko makiglalis nila. Ang nipadayag og mga simpatiya igo ra nakong gidasig pinaagi sa pag-ingon: mubangon ta!

Daw gidungog ang mga pangaliya sa mga dumadapig kay sa pagka petsa 7 pinaagi sa on line nabalik sa kahanginan ang labing pinaminaw ug gitan-aw nga TV Patrol. Gani nihakot kini og minilyon ka viewers sa on line. Pasiuna lamang kini sa atong pagbangon mga Kapamilya. Ang isyung legal nga gisang-at sa Korte Suprema maoy atong paaboton. Kini maoy labing importante aron sa hingpit ang atong mga kaigsoonan nga gihikawan sa nakalabay nga mga adlaw sa kahigayonan pagpamati sa gipalangyab nga pagsibya mahatagan sa ilang katagbawan. Ang tinuod nga balita dili ang gipabaha nga mga fake news.