Sigeg pangaway

Dear Noy Kulas,

Maayong adlaw ninyo mga Ka Super. Tawga lang ko og Rick, avid reader sa Superbalita ug tig-atang sa inyong page sa FB. Nagpadala ko aning akong suwat kay namasin mabasahan sa akong uyab nga wan a magparamdam. Tawaga lang siya og Rea, taga south sa Cebu, nagtrabaho unta sa Mactan pero niuli sa ilaha kadtong nagsugod na ang quarantine dinhi kay nahadlok siya nga di na makauli unya naa pa ang iyang anak sa probinsya kay single mother siya.

Sa pagsugod sa iyang pag-uli, maayo pa kaayo ang among communication kay sweet pa kaayo siya. Bisan sa text lami kaayo basahon kay full of love lagi. Kanang makapatay og buhi bisan naa ning coronavirus. Uy, hala, nagkadugay, magsige na man og kainit iyang ulo unya dayon pangaway. Pasanginlan dayon ko ga basin naa kuno koy lain diri sa city kay tanang tawo naa ra kuno sa community. Hangtod nga mahug na hinuon namong away ug nagkadugay, nagkauga ang among tagdanay hangtod naka-decide ko nga putlon ang among communication. Karon, wa na mi text text ug call kay nahiubos ko sa iyang pagsige og pangaway. Sakto ba nga akong giundang ang among communication? Ngano kaha nga init man kaayo siya og ulo? Naa na kaha siyay lain?

RICK

Rick,

Sakto ra sab ang imong gibuhat kay paglikay man na nga modako ang away. Dunay mga higayon nga ang pagpakahilom maoy labing maayong paagi sa pagkab-ot sa kalinaw. Pinaagi sa pagpakahilom di na mograbe pa ang panag-away, kana kon duna man gani.

Ikaw lang usay sabot sa imong uyab karong panahuna kay di lalim. Gawas nga init ang panahon, naa pa ning Covid nga nakaapekto sa panginabuhian. Kani bayang kakuwang o absence gyud sa kwarta, makapainit baya sa ulo. Mao tingali nga init pirme ang iyang ulo kay wan a siyay tarong o klaro nga income kay naundang sa trabaho tungod sa Covid. Busa, sabta lang sab siya ning panahuna.

Mahimo ra man nga mo text kag balik. Pangumustaha siya.

NOY KULAS