43 ka OFW miabot sa Sugbo
Nangabot sa Sugbo sa Biyernes sa alas 11:30 sa udto ang 43 ka mga overseas Filipino worker (OFW) nga seafarers agi sa Mactan Cebu International Airport (MCIA).
Ang seafarers nangatanggong sa kaulohan tungod sa pag-quarantine kanila sa kagamhanan sa ilang pag-abot sa nasod.
Matod ni Girlie Veloso sa Office the Presidential Assistant in the Visayas (Opav) nga dunay koordinasyon sa ilang buhatan ang biyahe sa Cebu Pacific ubos sa pakigtambayayong sa Overseas Workers Welfare Administration (Owwa).
Matod ni Veloso nga dunay certificate gikan sa Bureau of
Quarantine (BOQ) ang mga seafarer nga nakahuman sila sa 14 ka adlaw nga quarantine ug negative sila sa rapid tests sa coronavirus disease (Covid-19).
Gitapok sa waiting lounge 5 sa domestic arrival sa MCIA 43 ka mga OFW kagahapon sa buntag, Mayo 8.
Sumala pa sa tigpamaba sa MCIA, Mary Ann Dimabayao, nga pabilin nagtamod sa social distancing ang maong mga pasahero gikan sa ilang pagkanaog sa abyon.
Sila nagparehistro nga gi-andam sa Opav ug Owwa sa wa pa gihakot luwan sa tulo ka mga bus padung sa usa ka hotel sa Dakbayan sa Sugbo.
Nagkanayon si Dimabayao nga ang tanang ahensiya sama sa BOQ, Bureau of Fire Protection, Office of Civil Defense, ug Department of Health (DOH) ang nakig-alayon aron nga ikapatuman ang protocol sa tuyo nga ma-pundok ang mga pasahero ug mapa-ubos sa disinfecting.
“Actually kadtong lang Mayo 7 sa hapon mi napahibawo nga naay moabot nga OFW nga originally 69 ka buok. Ang kami igo lang mi nag-prepare sa airport sa ilang pag-abot,” tug-an ni Dimabayao.
Ang Cebu Pacific mao sab ang gisakyan sa laing 230 ka mga OFW o local tourist paingon sa Manila ug laing departure flight sa Air Asia nga gisakyan sa Dutch nationals (wa matino ang gidaghanon) nga natanggong gikan sa nagkadaiyang probinsiya sa Visayas areas.