Pagasa: pagbantay sa kainit karon

Ning gipaabot nga ang heat index moabot og 42 degrees Celsius karong tapos sa semana, ang publiko, labina ang frontliners sa coronavirus disease (Covid-19) nga nagbantay sa checkpoints sa kadalanan, gipahimangnoan nga magmatngon.

Kinahanglan maglikay sila nga di masakit o dunay pamation sa lawas dala sa kainit.

Si Al Quiblat, bureau chief saPhilippine Atmospheric Geophysical and Astronomical Services Administration (Pagasa)-Mactan , niingon nga ang temperatura sa Sabado ug Dominggo, hayan moabot og 27 ngadto sa 34 degree Celsius.

Kini tumbas sa heat index nga 42 degrees Celsius.

"Mopasilong jud sila from time to time and inom daghang tubig. Of course, mag andam og tuwalya nga basa. Makatabang man na siya as protective gear sa init," siya nagkanayon.

"During sa ilang duty nga init kaayo, dili magbusog kay kon busog, mo add siya sa init sa imong lawas," siya nidugang.

Iya usab nga giawhag ang publiko nga likayan ang dugay nga pagbuwad sa adlaw, gikan sa alas 11 sa udto ngadto sa alas 3 sa hapon.

Ang heat index, matod sa Pagasa, mao ang kahasol nga masinati sa tawo samtang ang temperatura nakaapekto sa lawas.

Matod sa Pagasa nga ang heat index nga 32 ngadto sa 41 degrees Celsius giila nga ubos sa Extreme Caution. Usa sa mga epekto niini mao ang bikog sa kainit ug kaluya. Ang padayong paglihok ubos sa kainit hayan mosangko sa heat stroke.

Matod ni Quiblat nga sila nakatala sa labing taas nga kainiton nga niabot og 35.6 degrees Celsius, mga alas 12:45 sa udto sa Huwebes, Mayo 7. Duna kini tumbas nga 43 degrees Celsius.

Mao kini ang labing taas nga kainiton nga ilang natala karong tuiga.

Siya nagtuo nga ang kainiton karong summer molabaw sa 37 degrees Celsius nga natala niadtong 2010, labing taas nga temperature.