8 ka tunghaan gihimong quarantine centers

Mga pili nga tunghaan sa lungsod sa Daanbantayan himuon nga mga quarantine centers aron nga may magamit alang sa mga taga Daanbantayan nga gipaubos Persons Under Monitoring (PUM) o ba kaha kadtong nakasinati og Influenza like illness (ILI).

Nadesisyonan sa Incident Command System (ICS) ug Inter-Agency Task Force (IATF) on Covid-19 nga himuon nga

quarantine centers ang walo ka mga tunghaan sa maong lugar.

Kini gibuhat aron di maglibog ang mga tawo kon asa modangop panahon kon makasinati og simtomas. Mahimo kining mo dangop sa labing duol nga tunghaan.

Alang sa mga taga barangays Bakhawan, Paypay ug Bitoon mahimo kining makadangop sa Bakhawan National Highscool; Calape National High School alang sa barangay Calape, Bagay, Malbago ug Bateria; Malingin National High

School alang sa barangay Malingin, Dalingding ug Tinubdan; Daanbantayan National High School sa Barangay Poblacion ug Pajo; Tapilon National High School sa Barangay Tapilon, Lanao ug Agujo; Maya National High School sa barangay Maya, Talisay ug Tominjao; Logon National High School sa barangay Logon ug Carnaza Elementary School sa Barangay Carnaza.

Ang mahimong isulod lang sa isolation centers mao ang kadtong mga tawo nga nakahimamat sa Covid-19 patients, gikan sa lugar nga dunay labing taas nga positibong kaso sa Covid, ug kadtong gikan sa dakbayan sa Sugbo.

Kining tanan nga nahisgutan mopaubos sa 14 ngadto sa 15 ka adlaw nga mandatory quarantine.

Aron masiguro nga maayo ang kahimtang sa mga PUM sa pasilidad, gitahasan ang mga councilor, punong barangay ug mga konsehal sa lungsod nga magsilbing camp managers.

Sa kasamtangan nga datos, ang lungsod sa Daanbantayan nakatala na og usa ka positibong kaso sa Covid nga gikan sa Barangay Lanao.

Ang pasyente nakabsan na sa kinabuhi.