ARUM MOBALIK PAG-PROMOTE KARONG HUNYO
Wala pa man tuod tino kon kanus-a makabalik og away sila si Jerwin Ancajas ug Johnriel Casimero apan adunay maayong balita alang sa duha ka Pinoyng world champions.
Nagkanayon si Top Rank Inc. head Bob Arum nga mopahigayon siya'g balik og promosyon sa boksing karong Hunyo.
Sama sa ubang paugnat sa kusog, nahunong ang kalibutan sa boksing niadtong Pebrero ning tuiga gumikan sa pagkuyanap sa coronavirus disease 2019 (Covid-19).
Nagkanayon si Arum nga nakigsabot na ang iyang kompanya sa ESPN aron pagdeterminar sa pinal nga eskedyul sa iyang giplanong pagbalik.
Giklaro ni Arum nga adunay dakong mga away ang nahilakip sa iyang planong buhian.
"They'll all be top fighters, really top fights," matod ni Arum sa boxingscene.com.
"Will there be a (Tyson) Fury-(Deontay) Wilder? No. But they'll be some of our top fighters . In other words, the fights will be similar as the fights we've been putting on ESPN and ESPN+."
Gilauman nga mahilakip niini ang tagsatagsa ka away nila ni Ancajas ug Casimero gumikan kay pareho man kining adunay kontrata sa Top Rank.
Gipasabot ni Arum nga ang boxing cards nga iyang buhian wala'y mga tumatan-aw gumikan kay gidili pa man ang pagpahigayon og kalihukan nga makahakot og daghang mga tawo isip usa ka lakang sa pagpakigbatok sa Covid-19.
"Don't kid yourself. For the rest of the summer, there won't be a crowd," pasabot ni Arum.
"I don't anticipate -- now, I don't know -- being able to do fights with any kind of crowd 'til the fourth quarter [of 2020."
Si Ancajas nakatakda untang modepensa sa iyang International Boxing Federation (IBF) junior bantamweight titles niadtong Abril 12, 2020 batok kang Jonathan Rodriguez apan wala kini nadayon gumikan sa Covid-19.
Mao sab kini ang nahitabo sa gikaintapang world bantamweight unification bout tali nila ni Casimero ug Japanese superstar Naoya "Monster" Inoue nga gikatakda unta niadtong Abril 25, 2020.