HAGIT NI ODLH GIDAWAT NI MCGREGOR
Gidawat ni mixed martial
arts (MMA) superstar Conor McGregor ang hagit ni boxing legend Oscar De La Hoya nga magbinukbokay sila ibabaw sa boxing ring. "I accept your challenge, Oscar
de la Hoya," tweet ni McGregor. Si McGregor, 31, kinsa lumad nga taga Dublin, Ireland, usa sa upat lang ka Ultimate Fighting Championship (UFC) fighters nga nakapanag-iya og mga titulo sa duha ka weight divisions.
Si De La Hoya, 47, kinsa usa ka Mexican-American nga nagpuyo sa Montebello, California, USA, nahimong world champion sa unom ka weight divisions sa iyang pagpamoksing sugod niadtong 1992 hangtod 2008.
Si McGregor usa sa labing sikat nga fighters sa MMA sa kasamtangan ug mao sab si De La Hoya sa iyang henerasyon sulod sa boksing.
Sa iyang pagretiro, si De La Hoya nahimong usa sa nagunang boxing promoters sa kalibutan.
Lakip sa iyang gidumala sa kasamtangan mao si Mexican legend
Saul "Canelo"
Alvarez ug ang sumosulbong nga si Ryan Garcia.
Ning bag-uhay lang, si De La Hoya nipadayag sa iyang intensyon nga mobalik og away aron kontrahon si McGregor.
Bisan sa iyang pangidaron, matod ni De La Hoya nga kaya niyang paundangon si McGregor sulod lang sa duha ka rounds.
Si De La Hoya naghupot og 39-6, 30KOs nga rekord.
“Oh, come on, brother,” matod pa ni De La Hoya sa interbyu ni Brian Campbell sa CBS Sports CombatState of Combat podcast.
“Two rounds. Because one thing about me, I went for the kill always. And look, Conor McGregor is – I love him in The Octagon. I respect him. I watch him all the time. But the boxing
ring is a whole different story."
Si De La Hoya wala na miaway human sa iyang 8th round TKO nga kapildihan batok kang Filipino boxing icon Manny Pacquiao niadtong 2008.
Isip usa ka boksidor, si McGregor kausa pa lang miaway diin nasugamak siya sa 10th
round TKO nga kapildihan batok kang boxing legend Floyd Mayweather Jr. niadtong 2017. Kon madayon ang De La Hoya-McGregor fight, gilauman nga makahalin sab kini og dako sa pay-per-view.