33 POSITIVE SA SITIO NEGATIVE

SA CARRETA, CEBU CITY DAGHANG BAG-ONG COVID-19 CASES

Dugang natala nga bag-ong mga kaso sa Covid-19 sa dakbayan sa Sugbo nagagikan sa Sitio Negative sa Barangay Carreta.

Kini base sa resulta sa mass rapid testing sa pipila ka dapit sa siyudad sa Sugbo sa Department of Health (DOH) sa miaging mga adlaw nga ilang giluwatan pagka Dominggo, Mayo 10.

Labing daghan og napositibo mao ang sityo Negative sa Carreta nga adunay 33 ka bagong mga kaso.

Ang Barangay Punta Princesa adunay usa ka kaso nga maoy labing una sa ilang barangay; usa sa Sitio Bato sa Ermita; usa sa Alaska, Mambaling; duha sa Barangay Sambag-2; usa ka kaso sa Sunset Drive sa Barangay Lahug; ug laing usa ka overseas Filipino worker (OFW) nga wa pa matino ang address.

Ang contact tracing team sa Cebu City Health Department (CCHD) nisugod na pagsuhid ug pag-ila sa mga tawo nga nakahimamat sa maong mga

nagpositibo alang sa ilang contact tracing.

Si Mayor Edgardo Labella nimando na ngadto sa Local Disaster Risk Reduction and Management Office ug sa Emergency Medical Service ug mga personnel sa CCHD nga ibalhin ang mga asymptomatic Covid-19 positive ngadto Carreta Elementary School nga maoy nagsilbing Barangay Isolation Center (BIC).

Si Konsehal Joel Garganera, kinsa maoy gitahasan ni Labella, nagkanayon nga gi-lockdown

na ang maong sityo aron mapugngan ang pagkatap sa virus ngadto sa kanait nga mga dapit.

Tabangan usab sa City Government ang Barangay Carreta pinaagi sa paghatag og dugang ayuda sama sa bugas ug delata.

Samtang naa sa BIC, atimanon ug monitoron sa mga tinugyanan sa CCHD ang asymptomatic patients.

Ang bag-ong natala na mga kaso sa Barangay Carreta resulta sa gipahigayon nga

contact tracing ug mass swab testing diin 398 kabuok ang nagnegatibo.

Hangyo ni Labella sa tanan nga magpabilin gihapon sa tagsatagsa ka panimalay ug mosunod sa tanang lagda sa City Government.

Sa kinatibuk-an, niabot na og 1,470 ka kaso ang natala sa CCHD.