Nurse na-trauma

Human nahitabo ang pagsablig og asido sa usa ka batan-on ngadto na sa usa ka nurse, hangtud karon wala pa mawala ang gibating kahadlok sa biktima.

Si Mary Bea Balili, kinsa nahinabi sa Superbalita Cebu, niingon nga human sa nahitabo kaniya, nagpanagana na siya sa pag-agi sa lugar diin siya gisabligan og asido.

Matod ni Balili, hangtud karon anaa pa kaniya ang pagka-trauma sa iyang pagpauli ug paggawas sa panimalay alang sa trabaho.

Sigon niya niadtong tungora nga samtang pauli siya sa iyang apartment gikan sa iyang pang gabii nga duty, gisabligan siya og asido sa wa mailhing tawo sa Queen's Road, Barangay Kamputhaw, siyudad sa Sugbo sa alas 7 sa gabii.

Samtang naglalaw kini pauli mga 500 metros ang gilay-on sa iyang apartment, usa ka lalake ang kalit lang nga misablig kaniya og asido.

"Mobuon to siya sir, sa akong duda minor to niwangon. Mao na nga wala nalang nako gukda kay minor dili man gihapon nako mapasakaan," matod ni Balili. Si Balili human sa insidente, dalidali kining niuli ug nag-ilis human naligo kay samtang suot niini ang uniporme nabantayan pa niini ang kabaho sa maong asido.

"Sa akong eight months nga paglakawlakaw dinhang dapita, karon pa gyud ko naing adto nga gisabligan ko," dugang sa nurse.

Human nga nakaligo na ang maong nurse dali kini dayon nga miadto sa estasyon sa Abellana Station 2 aron pagreport sa nahitabo kaniya.

Samtang, ang Investigation Detection and Management Branch (IDMB) sa Cebu City Police Office (CCPO) makigalayon kang Balili nunot na sa nahitabo kaniya.

Sutaon usab sa IDMB sa CCPO ang lugar kon duna ba CCTV aron matumbok kon kinsa kini ang nagsablig sa asido sa nurse nga frontliner.