100 ka pamilya gihatagan og ayuda sa CCPO
Kapin sa 100 ka mga kabus nga mga residente sa bukirang barangay sa Bonbon, dakbayan sa Sugbo ang gihatdan og hinabang sa Cebu City Police Office (CCPO) nga gipangulohan sa hepe nga si Police Colonel Josefino Ligan niadtong Sabado, Mayo 9.
Matod ni Colonel Ligan, ilang gituyo nga ang mga namuyo sa bukirang lugar sa dakbayan ang ilang gihatagan tungod kay sila ang nakasinati karon og tumang kalisod. Dili sila makalugsong sa siyudad tungod sa gipatuman nga enhanced community quarantine (ECQ) nga maoy hinungdan nga lisod alang kanila ang pagpangitag pagkaon.
Ang matag pamilya gihatagan og tag lima ka kilong bugas humay nga adunay gipataban nga delata nga sud-an ug tag usa ka tibuok karneng manok.
“Ang mga taga bukid man gud ang access nila going to the city is very limited that’s why atong gisaka didto kay kita na mismo ang naghatod sa ilang pagkaon. Poorest of the poor sila and then lisud pa silag access sa ilang needs kay walay transportation mao nang ato nalang gyud silang giadto gyud,” matod ni Ligan.
Gipasabot niya nga ang pipila ka personnel sa CCPO nagtampotampo ug adunay abag sa usa pribadong sektor nga maoy ilang gipamalit sa food supply.
Dili mahulagway ni Ligan ang gibating kalipay sa kapin usa ka gatus ka residente nga midawat sa hinabang nga bisan sa kagamay lang niini makakaon na sila. Kini usab pagpakita nga ang kapulisan sa siyudad dili lang pagpatuman sa balaod ang ilang gihimo lakip na niini ang pag-abag sa mga nanginahanglan panahon sa krisis.
Gidasig usab niya ang ubang Sugboanon nga adunay sobra nga pagkaon nga ihatag ngadto sa nanginahanglan karong mga panahona labi na sa mga bukirang dapit nga lisud ang pagpalit og pagkaon.
Ning panahon sa ka lisod angayan nga ipakita ang pagtinabangay sa matag usa.