Dili mokompiyansa

Nagkanayon ang mga opisyal sa dakbayan sa Sugbo nga dili katingad-an nga nag-una ang dakbayan sa tibuok Central Visayas sa labing daghan og kaso sa Covid-19 nga miabot na sa pagkakaron og kapin sa usa ka libo. Si Cebu City Councilor Raymond Garcia nipasabot sa usa ka episode sa iyang Facebook live nga tungod sa paglusad sa lokal nga kagamhanan sa mass rapid testing sa tanang dakbayan, mas daghang natala nga positibo kon itandi sa ubang dapit sa rehiyon nga wa mohimo o wa pa kaha makahimo sa samang lakang.

Base sa maong gidaghanon, pito pa lang ang natala nga nakabsan sa kinabuhi ug pipila kanila talandugon nang daan ang lawas o may dugay nang giantos nga sakit hinungdan sa pag-ubos sa ilang immune system nga dili makasugakod batok sa virus.

Tinuod ang obserbasyon ni Garcia, apan dili gihapon kini mokompiyansa sa pagtakboy sa virus labi na dunay tawo nga naa na niini apan asymptomatic o way mga timailhan sa naasoy sakit sama sa taas og temperatura, pag-ubo, lisod sa pagginhawa ug sip-on.

Samtang, grabe usab nato og likaylikay sa mga tawo nga dunay ubo ug sip-on o ubang simptomas apan negatibo sa virus. Ang ilang upper respiratory track infection mugna lang sa naandang kagaw.

Maayong kalamboan ang pagpahigayon sa massive testing taliwala sa pagkulit og imahen nga daghang kaso sa Covid-19 sa dakbayan. Mas bentaha nga nasayod kita sa atong tinuod nga kahimtang kaysa gitabonan ang kamatuoran sa mata sa publiko.

Apan mas maayong magbilin ang atong kinaiya nga dili gihapon mokompiyansa karon nga naghinayhinay pagpaluag ang awtoridad sa enhanced community quarantine (ECQ) ug pagsagop sa bag-ong normal sa atong kinabuhi sama sa pagkamitikuluso na sa personal ug social o community hygiene.