CASAS NANALIPOD KANG LABELLA; WAY OVERPRICING SA RELIEF GOODS

Gidepensahan ni Cebu City Administrator Floro Casas Jr. si Mayor Edgardo Labella nga walay overpricing sa ilang pagpalit og relief goods alang niining krisis sa Covid-19.

Kini human sila pasanginli ni kanhi mayor Tomas Osmeña nga nagpaburot sa presyo labi na sa sardinas nga apil sa gipamalit sa siyudad aron ihatag sa katawhan.

"Ang atoang purchases karon based gyud ni sa atong canvass. We only bought items nga naka-offer og lowest price unya maka-provide sad sa number nga atong gikinahanglan most especially kining sardinas," padayag ni Casas.

"We need 1.2 million cans and it was only La Nueva who can provide at a price of P22 per can. Since mao na ang lowest nga atong nakit-an ug sila sad ang maka-provide sa quantity. We went for La Nueva and that is much much lower compared sa presyo ni kanhi Mayor Tomas Osmeña sa iyang panahon nga P27 based sa PR nga atong nakuha. If si Tomas moingon siya nga kawatan mi sa P22 unya ang iya P27, mangutana ko karon ni Tomas kon si kinsa man ang kawatan siya ba o kami ba?" dugang sa city administrator.

Gipikhan usab ni Casas si Osmeña labot sa bugas niini nga gipalit niadtong Oktubre 24, 2018 nga tag P2,800 ang sako sa bugas.

"Ang bugas nato karon was only P2,470 per sack. Kadtong siya maoy nipalit, niabot og tag P2,800 kada sako nga pareha tag 50 kilos. Ang bugas atong imong panahon nga walay krisis tag P2,800 karon kang Mayor Labella kay P2,470 ug nihit pa ang bugas, karon mangutana sad mi kinsa ang kawatan?" batbat ni Casas.

Si Osmeña nipasangil kang Labella nga nipalit og P22 kada lata sa sardinas nga diin mapalit ra kini sa tag P17 ang labing mahal ug ang instant noodles nga gipalit og tag P11 ug wala mosunod sa price freeze nga giluwatan sa Department of Trade and Industry (DTI).