Balaudnon batok diskriminasyon bahin sa Covid-19 sa Mandaue
Giaprobahan sa konseho sa dakbayan sa Mandaue sa unang pagbasa ang ordinansahon nga mosilot sa indibidwal nga mo-discriminate sa mga suspected, probable ug kompirmado nga kaso sa Coronavirus disease 2019 (Covid-19).
Ang maong ordinansahon gipanday ni Mandaue City Councilor Nerissa Soon-Ruiz, ang chairperson sa Committee on Health.
Matod ni Ruiz, gisuwat niya ang maong ordinansahon human niya makita ang balita kabahin sa Social Welfare officer sa Lapu-Lapu City nga si Annabeth Cuizon.
Nipaambit si Cuizon sa diskriminasyon nga nadawat sa mga pasyente ug pamilya niini. "Akong gi-review ang ordinance ni Konsehal Maline nga for the the frontliners lang walay ordinance to protect the patients and their families," sigon ni Ruiz.
Dugang niya nga mao kini ang nagpaduso kaniya nga mopasar sa maong ordinansahon.
Gisaysay sa maong ordinansa nga lakip sa diskriminasyon ang pisikal, mental, emosyonal, verbal nga panakit, injury o pag-abusar, paghulga sa mga probable, suspected ug pasyente nga adunay Covid-19 ug ang iyang pamilya.
Silotan ang bisan kinsa nga mo-ban o mosalikway sa mga probable, suspected ug pasyente nga adunay Covid-19 ug ang iyang pamilya.
Ang publiko nga mga opisyal gidid-an nga mohikaw og hatag og tabang ngadto sa mga probable, suspected ug pasyente nga adunay Covid-19 nga gustong mopauli sa ilaha.
Ginadili sab ang pagbutyag sa identity sa mga probable, suspected ug pasyente nga adunay Covid-19 gamit ang social media or bisan unsang pamaagi gawas lang kon gamiton kini alang sa contact
tracing o laing medical nga mga katuyoan.
Ug uban pang mga buhat nga wala nahisgutan apan nakapaminus sa pagkatawo sa mga probable, suspected ug pasyente nga adunay Covid-19.
Ang mga makalapas niini pamultahon og P5,000 o mahimong mapriso og usa ka adlaw ngadto sa 30 ka adlaw o masilotan sa duha depende sa desisyon sa korte.
Gitan-aw sab ni Ruiz nga hinungdan nga ang uban magtago tago sa ilang sakit tungod kay mahadlok sila nga i-discriminate sa mga tawo.
Kauban sa pag-aprobar niining maong ordinansa mao sab ang pagpasar sa resolusyon ni Ruiz nga ang Department of Education motabang sa tanang ahensya sa gobyerno, tanang mga negosyante aron motabang og edukar sa mga tawo aron mawala na ang stigma ngadto sa mga probable, suspected ug pasyente nga adunay Covid-19 ug sa ilang pamilya.
"It is just ignorance maong
nahitabo ni (discrimination)," sigon ni Ruiz.
Naaprobahan ang ordinansa sa unang pagbasa ug ang resolusyon ni Ruiz niadtong Mayo 4, 2020 sa ika-43 nga regular session.