NBA MODESISYON NA SUNOD BUWAN?

Gibutyag ni National Basketball Association (NBA) Commissioner Adam Silver nga posibleng karon nang Hunyo mobuhig pinal nga desisyon ang liga kabahin sa plano niining ibalik na ang ilang mga duwa.

Duha ka venues nga nahimutang sa dapit nga dili kaayo apektado sa pagkuyanap sa coronavirus disease 2019 (Covid-19).

Nag-una sa listahan s gipilian mao ang Las Vegas ug Orlando.

Sa usa ka conference call, gisultihan ni Silver ang mga magduduwa nga kon wala gihapo'y vaccine nga madiskubrihan sa sunod buwan, hayan maahat ang liga sa pagpahigayon og mga duwa nga wala'y tumatan-aw.

Nidugang si Silver nga adunay ipahigayon nga testing sa tanang mga magduduwa matag adlaw unya i-quarantine dayon ang masutang positibo.

Gipasabot ni Silver nga dili sab nila magamit ang home-andaway format gumikan kay lisod ang pagbiyahe tungod sa social distancing nga gipatuman.

"There's no point in adding risk for flying all of you city to city if there's not going to be fans. We think it would be safer to be in a single location, or two locations, to start," matod ni Silver.

Giangkon ni Silver nga bugat nga kalbaryo alang sa NBA ang pagpahigayon og mga duwa nga wala'y tumatan-aw.

Matod niya, 40% sa kita sa liga nagagikan sa halin sa mga tiket ug sponsorships. Kon wala'y mga tumatan-aw, lisod ang pagdani og sponsors.

Giasoy ni Silver nga ang tanang 30 ka tag-iya og teams sa liga uyon nga ibalik na ang mga duwa.

Gipasabot ni Silver nga mohatag sila og tulo ka mga semana nga lugway aron maka-training pa ang teams sa dili pa ibalik ang mga duwa.

Aduna sa'y plano nga usahon pagpapuyo ang tanang mga magduduwa sa usa ka lugar aron dili kini mataptan sa Covid-19.

Apan dili tanan uyon ning maong plano.