Guiao: Sotto, Edu angay hataga'g luna sa Gilas

Alang sa bantugang coach nga si Yeng Guiao, angayan nga hatagan og seguradong mga luna sila si Kai Sotto ug AJ Edu sa Gilas Pilipinas nga mokampanya sa 2023 Fiba World Cup.

Ang kanhi national team coach mipagawas ning maong ideya atol sa Hoop Coaches International free webinars nga gipasiugdahan sa Blackwater.

"Ilagay na natin yung isang slot dyan kay Kai Sotto, yung isang slot dyan ibigay natin kay AJ Edu. We have to reserve slots for them," pasabot ni Guiao nga napatik sa Spin.ph.

Si Sotto, kinsa aduna na'y 7'2" nga gitas-on sa edad nga 17 pa lang, kasamtangang nag-training sa The Skills Factory sa Atlanta, USA.

Usa si Sotto sa batan-ong mga magduduwa nga adunay dakong potensyal nga gitanyagan nga moduwa sa bagong naporma nga National Basketball Association (NBA) G-League select program.

Sa iyang bahin, ang 20 anyos ug 6'11" nga si Edu, kinsa produkto sa University of Toledo, padayon pang nagpaalim sa angol (ACL) nga iyang naangkon atol sa 2019 Fiba Under-19 World Cup.

Nagkanayon si Guiao nga tulo ka mga tuig gikan karon, hayan mosamot na ka maayo ug mahinog na ang abilidad ning duha ka batan-ong mga basketbolista.

Nidugang si Guiao nga angayan sab mahatagan og saktong luna sa national team si Thirdy Ravena, kinsa usa sa kasamtangang amateur players nga adunay talagsaong abilidad.

Naa sab ang lima ka mga rookie sa Philippine Basketball Association (PBA) nga gihuwaman sa Samahang Basketbol ng Pilipinas (SBP) aron ilakip sa training sa Gilas Pilipinas nga ihamag sa 2023 nga kombati.

Gipangtumbok mao sila si Isaac Go, Allyn Bulanadi, ang kaluha nga sila si Matt ug Mike Nieto hasta ang kanhi Cebu-based nga si Rey Suerte.

Ang nangahisgutan magtutok una sa kampanya sa Gilas Pilipinas una kini moduwa sa ilang mother teams sa PBA.

Ang ubang mga batan-on nga gilakip sa training pool mao sila si Jaydee Tungcab, Kobe Paras, ang magsuong sila si Juan ug Javi Gomez de Liano, Dave Ildefonso, Justine Baltazar, ug Dwight Ramos.

Aduna say mga magduduwa sa PBA ang nahilakip sa training pool nga gipangulohan sa Sugboanong higante nga si June Mar Fajardo.