‘MOPAPATAY’ NI PDUT, SIKOP
GIINGONG MITANYAG OG P75M SA FB POST; MIHIMAKAK, KANHI LIVE-IN GIPASANGINLAN
■ GIDAKOP: Si Maria Catherine Ceron (wala), 26, taga Barangay Ibabao, lungsod sa Cordova, Sugbo gidakop sa Criminal Investigation and Detection Group (CIDG) 7 ug ubang unit sa kapulisan sa Miyerkules sa buntag, Mayo 13, tungod sa giingong pag-post nga nagtanyag og P75 milyunes sa mopatay kang Presidente Rodrigo Duterte. Estorya sa pahina 2.
Babaye nga mitanyag og P75 million sa iyang Facebook account post sa makapatay kang Presidente Rodrigo Duterte nasikop sa hiniusang pwersa sa Criminal Investigation and Detection Group 7, Regional Intelligence Unit ug Regional Anti-Cyber Crime Unit 7 sa lungsod sa Cordova, Miyerkules sa buntag, Mayo 13.
Ang suspek giila nga si Maria Catherine Ceron 26, dalaga, taga Barangay Ibabao sa mao nga lungsod.
Ang suspek nihimakak nga siya ang ni-post, nipasangil sa iyang kanhi kapuyo nga wa pa maka move on nga maoy nihimo atol sa iyang pagatubang sa mayor sa lungsod niadtong Mayo 12.
Matod ni Police Major Ronald Allan Tolosa, deputy regional chief sa CIDG-7, nga samtang nagpahigayon og cyber patrolling ang ilang mga personnel, ilang nakita ang post ni Ceron sa social media.
Nakig-alayon dayon sila sa RACU aron si Ceron dakpon. “So, this post no nag circulate ni siya through sa FB. Then because of the social media exploitation or investigation, nahibaw-an nato nga naay mga ingon ani nga panghitabo nga diin gibawal kini sa atong balaod,” matod ni Tolosa.
Kasong inciting to sedition ubos sa Article 142 sa Revised Penal Code ang ipasaka sa kapulisan batok kang Ceron.
Ubos sa maong balaud, ang mamatud-ang sad-an silutan og reclusion perpetua kun pagkabilanggo og 20-40 ka tuig o death penalty. Apan ang nasod niwagtang sa death penalty kapin usa ka dekada na ang nakalabay.
WA KA MOVE ON
Giingong gihimakak ni Ceron nga siya ang ni-post.
Bisan sa iyang pagpakig-atubang kang Cordova Mayor Mary Therese Sitoy-Cho, si Ceron nihimakak nga siya ang ni-post.
Iyang gitumbok ang iyang kanhi live-in partner, kinsa gituohan sa mayor nga wa pa maka
move on, nga maoy nihimo. Si Ceron nidangop kang Cho niadtong Martes, Mayo 12, aron paglimpyo sa iyang ngan.
Si Cho niingon nga nagduda si Ceron nga ang iyang kapuyo nga iyang gibuwagan niadtong Pebrero ang naghimo og fake account niya nga kompleto sa hulagway ug uban pang mga detalye.
“Morag wa pa ni (kanhi livein) ka-move on ba,” saysay sa mayor kon basehan ang pangankon ni Ceron kaniya.
Sugilon ni Ceron ngadto kang Cho nga kon siya maoy nihimo sa death threat post batok ni Duterte, iyang itago ang iyang tinuoray nga identity, ilabi na ang address.
Nitambag si Cho sa iyang konstituente nga motabang sa kapulisan kon tinuoray nga di siya maoy ni-post ug masilotan kadtong nihimo sa ingon.
“Kon dili ikaw, tabang og pangita og si kinsa to. Maninguha pud ka nga masubay nang tawhana (gipasanginlan),” tambag sa mayor ngadto ni Ceron.
BISAN PA
Matod ni Tolosa nga bisan sa panghimakak ni Ceron, ila gihapon kini nga pasakaan og kaso ug didto na siya mopasabot sa korte.
“Matod pa niya aduna kunoy migamit sa iyang account. Pero sa amoang part as investigation man gud, amoa sang i-establish kon unsa ka tinuod ang iyahang statement. So with the support sa atoang Regional Anti Cyber Crime Unit, we will stick with the filing of the case,” dugang ni Tolosa.
Gipasabot usab ni Tolosa nga daghan na ang nadakpan nga susama sa gihimo ni Ceron.
Niadtong Lunes, usa ka magtutudlo sa Santa Cruz, Zambales ang gidakop usab sa National Bureau of Investigation tungod sa pag-awhag niini sa publiko nga patyon ang Presidente bugti sa P50 million.
“Dili man gud ni komedya. Fair warning sa atong citizens nga nakadungog ani nga report nga likayan ni nga paghimog susama nga mga post diha sa FB account or other social media sites,” matod ni Tolosa.
Ang mga intelligence unit sa Central Visayas mopalawom pa sa ilang imbestigasyon kon wa bay nagpaluyo sa mga nag post sa social media labot sa tinguha sa pagpapatay sa Presidente.