P1M KAPIN CASH NGA AYUDA SA SAP SA LAPU-LAPU, GIULI
Kapin na sa P1 milyunes nga hinabang pinansiyal ang giuli ngadto sa kagamhanan sa siyudad sa Lapu-Lapu gikan sa mga benepisaryo sa social amelioration program (SAP) nga dili kuwalipikado sa naasoy nga ayuda.
Nasayran sa Superbalita Cebu nga 180 na ka tawo, kapin kun kulang, nga unang nakadawat sa hinabang ang boluntaryong niuli sa P6,000 emergency cash assistance nga kasamtangang anaa na sa city treasurer’s office.
Apan giklaro sa City Social Welfare Services (CSWS) nga dili basehanan ang masterlist sa SAP beneficiaries nga awtomatik makadawat sa hinabang, nagkinahanglan kining hashasan.
Kini mahitungod sa nadangat sa kahanginan sa radyo nga adunay 51 ka mga nag-apilyedo og Berdin sa Barangay Babag, ang anaa sa listahan.
“Ang DSWD (Department of Social Welfare and Development) ang magbuot kung kinsay tagaan base sa ilang
records nga mga ma-left out o naa sa ilang waiting list,” pahibawo ni Mayor Junard Chan.
Gihangop sa mayor ang mga matinud-anong indibiduwal, kay ang mga inuli nga ayuda itunol ngadto sa mas labing nagkinahanglan o ang gihulagway nga poorest of the poor.
Dili ikalimod nga adunay mga arangan nga pagkabutang sa estado sa kinabuhi ang gi-apilan og hatag sa maong ayuda, taliwala sa paningkamot sa kagamhanan nga kadtong mga kabus ang priority sa maong hinabang. Nanghinaot si Chan nga mapun-an pa ang mga mo-uli sa maong ayuda ug mahimong moduaw lang sa iyang buhatan o ang pagtawag sa city hall hotline.
Sa laing bahin, ang officer-incharge sa City Social Welfare Services (CSWS) Annabeth Cuizon nagkanayon nga dili tanan nga anaa sa masterlist ang hatagan sa emergency
assistance kay gikinahanglan pang limpyohan ang maong listahan sa kadto lang angayang tunolan sa ayuda.
Kini sa dihang mitumaw ang reklamo nga gipadangat sa programa sa RGMA Super Radyo nga adunay 51 ka tawo nga nagdala sa apelyidong Berdin sa barangay Babag, LapuLapu ang lakip sa listahan.
Nisamot ang pagduda ilabi na nga ang barangay kapitan sa Babag, Arsenio Berdin.
Ang Babag naila nga balwarte sa maong mga kaliwat hinungdan nga daghan ang pamilyang Berdin nga nanimuyo sa maong barangay.
Nasayran nga 2,143 ka SAP beneficiary sa Babag, 51 ka tawo niini adunay apelyidong Berdin.
Ang buhatan ni Cuizon bukas sa bisan unsa reklamo apan way pormal nga reklamo ang nadangat sa ilang buhatan mahitungod niini.
Gisuwayan sa Superbalita Cebu sa pagtawag ni Kapitan Berdin, apan dili kini makontak.