Kooperar sa gobyerno

Sukad gipatuman ang general community quarantine (GCQ) hangtod nga gisaka ngadto sa enhanced community quarantine, daghang mga lakaw sa kinabuhi ang nangausab. Pagsugod pa lang sa GCQ, gidili na ang mga panagtapok tungod sa hulga sa coronavirus disease. Gipasirhan na ang mga negusyo nga alang lang sa kalingawan.

Nisamot na kini dihang gipatuman ang ECQ. Wa nay gitugtang makagawas nga di magsul-ob og mask. Gikinahanglan nga dunay quarantine pass ang mogawas.

Bisan asa nga establisemento nagpatuman na og social distancing, kinahanglan dunay ECQ pass kon mamalit. Bisan ang pagkaligo sa dagat, sapa ug swimming pools gidili sa lalawigan sa Sugbo.

Daghan ang namakpak dihang gilibkas ni Cebu City Mayor Edgardo Labella ang pagbali ya og ilimnong makahubog.

Inom pa lang gani, daghan na ang nangalipay. Unsa na kaha kon malibkas na ang tanang gipangdili kay nahanaw na ang hulga sa Covid?

Karong Sabado, moduha na ka buwan sukad gisugdan pagpatuman ang quarantine dinhi sa Sugbo. Ang naandang kinabuhi nausab og maayo. Busa, daghan na ang nagpanikad nga mahibalik sa naandang normal. Unsaon man paghibalik sa normal kon daghan gihapon ang wa magtuman o magseryuso sa pagsunod sa mga lagda?

Daghan gihapon ang magtapoktapok sa mga komunidad aron mag-estorya bisan kon nagtambag ang kagamhanan sa pagpuyo lang sa balay. Wa gani social distancing sa ubang mga pagpang-apod-apod sa hinabang.

Gusto usab ang kagamhanan nga mahibalik na sa normal ang kinabuhi kay bisan sila nagping-it na sa kadaku sa galastuhan ug kahinay sa kwartang misud sa panudlanan. Busa, gilusad ang mass rapid diagnostic test aron pagsuta asa ang mga dapit nga dunay hulga sa Covid.

Apan bisan gani sa pag-abot sa 40 porsyento sa target nga gidaghanon, wa pa maabot kay gamay ra ang nagpakuhag dugo.

Gusto man kaha kitang mahibalik dayon sa normal, nganong di man mokooperar sa mga lakang sa kagamhanan?