24 NAGSUGAL; SAGAD BENEFICIARY SA SAP
Lima ka mga benepisaryo sa Social Amelioration Program (SAP) ug Unconditional Cash Transfer (UCT) sa lungsod sa Cordova nadakpan sa Cordova Police sa dihang naatlan nga nagtong its niadtong Huwebes, Mayo 14, taliwala sa gipatuman nga enhanced community quarantine (ECQ).
Ang ikaunom wa maapil sa hinabang sa kagamhanan.
Laing 18 usab ang nasikop sa kapulisan samtang nagsugal sa nagkadaiyang mga dapit sa Sugbo ug Central Visayas. Gituohan gihapon nga kadaghanan kanila beneficiary sa hinabang sa Department of Social Welfare and Development (DSWD).
Gitug-an sa hepe sa Cordova Police Station, P/Lt. Jan Ace Layug, nga nakadawat sila og taho gikan sa concerned citizen mahitungod sa unom ka mga tawo nga nagtapok sa Sityo Camino, Barangay Gabi, lungsod sa Cordova.
Niguwa nga positibo ang maong taho sa dihang naaktuhan sila si Joven Veloso Seguisabal, 25; Analyn Abayon Inting, 43; Florilyn Verano Inting, 52; Marcelo Dayuday Garrido, 43; Emmanuel Verano Inting, 19; ug Camelo Veloso Seguisabal Jr., 28.
Nasuta nga sa unom nga nasikop, tulo niini SAP beneficiaries samtang laing duha benepisaryo sa Unconditional Cash Transfer.
Tukmang kaso ang giandam batok sa mga unom samtang temporaryong gibalhug sa police station.
Gipahinumduman ni Layug, pinaagi sa iyang Facebook post, ang mga Cordovahanon nga motamod sa protocol nga gipatuman sa kagamhanan aron kalikayan nga mokuyanap ang coronavirus disease.
"While we are at the frontlines of our battle against Covid-19, we will not cease from conducting operation against all forms of illegal activities," dugang pa ni Layug.
Samtang 18 ka mga tawo ang nasikop sa dungan nga anti illegal gambling operations sa Criminal Investigation and Detection Group 7 sa Negros Oriental ug Metro Cebu field unit.
Matod ni Police Major Ronald Allan Tolosa ang deputy regional chief sa CIDG-7 nga pito ang nadakpan sa Negros Oriental.
Sa Sugbo, tag tulo sa siyudad sa Naga ug Talisay, duha sa Mandaue ug tulo sa Lapu-Lapu City.
Ang mga nangadakpan mao silang Junetry Manlisic ug Arnold Ruta sa siyudad sa Mandaue; Guyren Constantino, Carlito Jayme ug Henry Sismar sa Talisay; kapitan Flavio Dimson Jr, Ricky Bolhano, Danilo Ogas, Johnny Malig-on, Novenario Tatoy, Ron Electona ug Leozalde Diaz sa Negros Oriental.
Nasikop usab sila si Eper Avila, Ramonito Reyes ug Marina Dejito sa Naga, Rodrigo Berame ug Carmelita Amoin sa Dakbayan sa Lapu-lapu.
Nakadawat og impormasyon ang CIDG-7 nga bisan sa gipatuman nga ECQ adunay nag sugal sama sa tong its ug piyatpiyat nga maoy hinungdan nga gilusad nila ang operation.
Dugang ni Tolosa nga kasagaran sa mga nadakpan benepisyaryo sa UCT ug SAP.
Nasagmuyo si Tolosa nga ang ayuda wala gigamit alang sa ilang pagkaon, inay ila kining gigamit sa pag sugal.
“Mao bitaw to nga ang atong Presidente naghatag og instruction sa kapulisan, mag conduct gyud og operation against illegal gambling gumikan kay kining kwarta nga ayuda gikan sa gobyerno, supposed to be, maadto sa pagkaon.Nahitabo karon pagkadawat nila ani , ila na nuon gigamit sa pag sugal-sugal,” matod ni Tolosa.
DI DIHA-DIHA
Dili diha-diha makatangtang ang DSWD sa beneficiaries sa UCT nga nadakpan sa sugal.
Matod ni DSWD 7 Assistant Regional Director Shalaine Marie Lucero nga kon basehan ang guidelines sa Listahanan, dili diha-diha matangtang sa lista ang UCT beneficiary tungod kay wa sa guidelines nga pwede tangtangon ang madakpan tungod kay nagsugal kini.
Si Lucero nipasabot nga kon Pantawid Pamilyang Pilipino Program nga beneficiary kini, mamahimo ipaubos sa case management diin moagi og proseso ug due process sa di pa hingpit nga matangtang sa lista.
Magdepende usab sa social worker kon tangtangon ba sa lista atol sa validation kon beneficiary kini sa SAP ug possible nga di na kini makadawat sa ikaduhang hugna sa SAP. /