■ NAKIGTABO:
Si Gobernador Gwendolyn Garcia (nagbarog, nagkupot sa microphone), nakigsulti sa mga mayor sa lalawigan sa Sugbo sa usa ka tigom nga gipahigayon sa lungsod sa Balamban, Mayo 15, 2020. Ilang gituki ang mga guideline nga ipatuman sa pagsugod na sa general community quarantine (GCQ) nga moepekto karong adlawa, Sabado, Mayo 16, 2020.
Gipatugbaw ni Gov. Gwen Garcia ang iyang pilosopiya sa pangalagad, 'Greater Good for the Greater Number.” Sa kalibotanong hadla sa misibaw nga Covid-19 nga nakamugna og tumang kabalaka, gihimo gilayon ang target alang sa polymerase chain reaction (PCR) testing.
Isolation centers giandam sa barangay, lungsod, siyudad, 12 ka district hospitals, upat ka provincial hospitals ug sa gitanyag sa mga negosyanti nunot sa pag-apud-apod og personal protective equipments. Kon seryuso ang kaso dalhon sa Vicente Sotto Memorial Medical Centrer (VSMMC).
Gitrangkahan ang mga utlanan gawas sa border pass sa mga exempted. Idiretso og kwarentina ang mga oveerseas Filipino worker (OFWs) nga gipapauli.
Sa sayo pa giundang ang pagbisita sa bilanggoan,, gihingusgan ang disinfection ug giaporan sa mga bitamina ang persons deprived of liberty o mga piniriso. Gilain og selda ang dunay timailhan sa sakit.
Guwardya ug staff nga naa sa dapit nga naigo sa Covid-19 gipapuyo sa balay. Kadtong nag-duty wala una papaulia gigastohan og pagkaon.
Ang Cebu South Bus Terminal gihimong Bagsakan Center inay adto itumod sa Carbon ug Pasil taliwala sa kahingawa nga maplastada sa inpeksyon sanglit daghang kaso sa Covid-19 sa siyudad nga kuyaw sila mahimong carrier ngadto sa probinsya.
Tindahan sa Kapitolyo sa mga lungsod ug siyudad namaligya sa nag-unang palaliton. Gibaligyag barato aron mainat ang balor sa gihuptang kwarta sa mga kabos nga maoy baligyaan. Gikontrolar ang pagbaligya basi sa gidaghanon sa pamilya.
Mokabat P376 milyunes ang ayuda sa Kapitolyo ngadto sa mga local government unit (LGUs). Gitabangan ang mga natanggong subay sa paglusad sa Stranded Cebuanos Assistance Center.
Tinguha ni Garcia nga mahimong self-reliance province ang Sugbo. Gitigom ang mga negosyante nga human sa enhanced community quarantine (ECQ) maoy tutokan ang enhanced countryside development.
Kon duna silay halapad nga luna sa probinsya luwason ang ekonomiya nga mahimong self-sufficient sa mga produktong agrikultura kaysa maglumbag tukod og condominium.
Makabangon sa ekonomiya dili lamang ang patigayon, industriya ug turismo kondili ang mga mag-uuma sab nga maoy dugokan sa nasod.
Gidasig ni Garcia ang kontest sa purok diha sa barangay sa pagpananom og utanon, uban pa nunot sa pagpanghatag og binhi.
Giumol ang Task Force New Normal nga mohan-ay sa mga sumbanan pangandam sa inanay nga pagkutat sa Covid-19.
Banhawon ang agri-business ug pakusgan ang agrikultura pagpahimsog sa ekonomiya alang sa malungtarong kalamboan.