48 ka tawo miabot na sa Mindanao
Sa kataposan, niabot na 48 ka mga tawo ang nauli na sa ilang tagsatagsa ka dapit sa Mindanao niadtong Huwebes sa udto, Mayo 14, human sila nakasakay sa cargo nga barko gikan sa dakbayan sa Sugbo sa Miyerkules, Mayo 13, alas 9:30 sa gabii.
Ang mga pasahero taga Cagayan de Oro City ug Iligan City.
Ang barkong Lite Ferry 29 nanukad sa Pier 1 sa Sugbo ug nidunggo sa pantalan sa Cagayan de Oro sa Huwebes sa udto, Mayo 14.
Natanggong sila dinhi tungod sa 'no sail policy' sa Coast Guard tungod sa enhanced community quarantine (ECQ) sa Sugbo.
Si Elijah John Gargar, civil engineering graduate, taga Baragay Carmen, Cagayan de Oro, usa sa mga pasahero, niingon nga miari siya sa Sugbo aron unta mag-review alang sa board exam.
Niadto pang Marso giundang ang ilang klase hinungdan nga wa na siyay tarong nga review.
Duna usab siyay mga kauban sa pag-review nga mga taga Mindanao.
NGANONG NAKAULI
Nakabasa sila sa Facebook page sa local government unit (LGU) sa Cagayan de Oro ug Iligan City nga andam silang mogasto sa pag-uli sa ilang mga lumolupyo nga nangatanggong sa laing dapit.
Diha-diha sila ni-coordinate dayon sa ilang tagsa ka LGU.
Ang ilang barangay nihatag og certification ngadto sa LGU nga lumolupyo sila sumala sa ilang gipanghatag nga mga address.
Ang siyudad na maoy ni-coordinate sa kagamhanan sa siyudad sa Sugbo aron sa pagpapauli kanila.
Niuyon ang siyudad ug gi-arrange sa Cagayan de Oro ug Iligan City governments ang ilang biyahe.
Apan subay sa protocol, nagpa-quarantine una silang tanan og 14 ka adlaw sa Cebu City.
Matod ni Gargar nga laing 14 na usab ka adlaw nga quarantine ang ilang agian sa ilang pag-abot sa tagsa ka lokalidad.
Gisugat sila sa mga sakyanan sa ilang tagsa ka LGU sa ilang pagdunggo sa pantalan.