Meco mihatag og lugway sa balayranan

Nipasalig ang Mactan Electric Company (Meco) nga bahinon og kaupat ang bayranan sa kuryente sa mga Oponganon nga na-pending sukad niadtong buwan sa Marso.

Kini human nga mipasar g bag-ong resolusyon ang konseho

sa dakbayan sa LapuLapu sa paghatag og konsiderasyon sa Meco sa bayranan sa mga Oponganon aron dili sila mabug-atan sa pagbayad.

Ang bayranan sa kuryente sa mga Oponganon wala lang una paningla sa Meco sukad niadtong Marso ning tuiga.

Si Konsehal Rico Amores maoy nangamahan sa naasoyng resolusyon nga giuyonan pinaagi sa mass motion.

Matod ni Amores nga ubos sa naasoyng resolusyon adto na bayran sa mga Oponganon ang ilang nag-ung-ong nga bayranan human sa 30 ka adlaw sa paglibkas sa enhanced community quarantine (ECQ).

Kini aron tagaan og kahigayonan ang usa ka indibidwal nga makabalik og trabaho una.

Gawas sa nag-ung-ong bayranon nga bahinon og kaupat, idugang unya niini ang kasamtangang bayranon unya sa usa ka konsumidor.

Katulo ra unta tungaon ang nalatid sa resolusyon sa konseho sa dakbayan apan, ang Meco na mismo ang boluntaryong midesider nga kaupat na lang bahinon aron gamay ra ang bayranan sa usa konsumidor.

Nalatid usab sa resolusyon nga nag-awhag sa Metropolitan Cebu Water District (MCWD) sa pagpatuman sa susamang paagi usab sa mga bayranan sa tubig sa mga Oponganon.

Nanghinaot si Amores nga mohatag usab ug konsiderasyon ang MCWD.

"Verbally ni-agree na sila human nga pagka approve sa resolution gitawgan ni Mayor (Junard Chan) ang Meco ug gipasabot unya ni okay man sila. Mapasalamaton ta kay dako ning impact sa atong kaigsuonan nga dili kaayo sila mabug-atan.." matod ni Chan.