Hatag-bawi, asa iuli?
Natapos na ang tagal sa pag-apud-apod sa cash nga ayuda sa social amelioration program (SAP) sa kagamhanan niadtong Mayo 10, Dominggo. Apan daghan pang barangay ang wala nakakompleto, labi na sa dakbayan sa Sugbo. Tungod niini, nagpadayon usab ang way puas nga reklamo. Komon ang hatag-bawi bisan wa pa moinit kini sa kamot gihatagan, kinsa nagduda kon mauli ba kaha kini sa panudlanan sa kagamhanan? Nanguha og balik sa salapi mga kawani lang sa barangay.
Sama sa Barangay T. Padilla sa dakbayan sa Sugbo, ang reklamo gipaabot ning mantalaan. Kasaligan ang tinubdan, apan kinahanglang maproseso nato ang alegasyon sa tukmang pagsubay ug pagkuha og pisikal nga ebidensiya ug mga tawong mobarog nga saksi sa hitabo.
Kini tanan, mahimong ipasa sa tukma nga ahensiya sa kagamhanan sa pag-imbestigar, makasuhan ug mapahamtangan og silot. Ang Department of Social Welfare and Development (DSWD) nipadayag nga andam mamati sa mga reklamo.
Ang nakapaet dunay barangay ang nanghunaw sa bulilyaso sa listahan. Giduot ang DSWD. Apan dili sila makalikay. Isip mas nasayod sa dapit, gigiyahan unta nila ang mga kawani sa DSWD alang sa tarong nga listahan.
Sama sa nagiyahan hinuon nga malista ang ilang kaalyado ug kabanay bisan dili kuwalipikado. Mas paet. Ang nabawian lang kadtong gilantaw seguro nila nga naa sa kaatbang nga kampo sa pulitika.
Busa tambag sa mga naapiki nga molupyo, pagkuha og kopya sa listahan o kuhaig hulagway sa inyong camera. Mas nakaila kamo sa inyong kasilinganan. Butangi og tsek o marka ang ngan sa di kuwalipikado apan nakadawat, nagdoble og dawat sa pamilya, ug labi na kadtong wa bawii sa ilang ayuda.
Ayaw kahadlok sa pagbarog sa kamatuoran aron maputol na ang kadena sa pagpanglupig ug pag-abuso sa mga kabus.