Pagbalik sa klase
Kumusta na, mga estudyante. Laa nga matanggong sud sa balay, di ba? Nahibalo ba kam nga ang taga Department of Education (DepEd) nagsugod na og tuki sa isyu sa posibling pagpangabli sa klase sa Agusto 2020 na?
Dunay mga inisyal nga gihisgutan unsaon kini taliwala sa padayon nga pagpanghulga sa Covid-19.
Sa mga ginikanan, kong kamo ang pangutan-on, andam na ba mo sa pag-abli og balik sa mga eskwelahan? Paeskwelahon ba ninyo ang inyong mga anak? Unya kay wala pa may vaccine para sa coronavirus?
Basi sa mga estorya sa mga ginikanan labot ning maong isyu, dunay nipabor nga mobalik ang klase. Duna say nisupak. Sa mga nisupak gusto silang makasiguro nga layo sa peligro ang ilang mga anak batok sa Covid-19 sa dili pa maghisgut og klase. Ilang tuyo nga hulaton una nga makaplagan ang tambal sa dili pa maestorya og klase.
Pangutana sa usa ka inahan, bisan kong ka usa o kaduha matag semana mo-eport ang ilang anak sa itang classroom, unsay garantiya nga di kini matakdan sa makamatay nga virus? Ibutang ta lang nga gideklarar nga Covid-19 free ang barangay nga gipuy-an sa estudyante, unya ang iyang mga classmate?
Bisan kon tumanon ang tanang lagda sa gobyerno sama sa pagsul-ob og face mask, social distancing ug pagpanghugas sa kamot, mapasalig ba ang DepEd nga dili ni sila mataptan o matakdan ba hinuon sa covid19?
Kung di malikayan moabot sa punto nga covid-19 positive ang bata, mopasalig ba ang DepEd maoy mogasto sa pagpaospital o pas-anon ra gihapon sa mga ginikanan ang ka dako sa bayronon.
Sa iyang post sa Facebook akong higala nipadayag sa itang sentimento ning maong isyu. Matod niya sa kadaghan sa mga bayronon nga resulta sa lockdown, may budget pa bang nahabilin labi na sa mga bata nga nagtungha sa mga pribadong eskwelahan?
Di pa ni mao, mabalik ba sa naandan ang panginabuhi sa mga ginikanan human masikwate pagsugod ning maong pandemic pipila na ka bulan ang nakalabay?
Sa mga niuyon sa plano sa DepEd nga magsugod ang klase sa Agusto, nakasabot ko nga importante kaayo sa mga bata ang edukasyon.
Ang matag adlaw, semana ug bulan nga natanggong sila sa balay anugon kaayo. Pero para nako, angay nga hinuktukan kini sa makadaghan.
Miyentras tanto nga wa pay nadiskubrehan nga tambal o
vaccine kining nga matang sa virus ang pagpuyo sa balay sa mga bata mao gihapon ang pinaka epektibo nga paagi nga malikay sila sa maong sakit.
Kanang ilang giingon nga online nga paagi sa inadlaw nga leksiyon ambot og masustinihan ba na nga wala man mag-apod og internet connection apil na ang kahimanan ang matag pamilya.
Asay maayo og panginabuhi ug pagpamayad sa utang ang atong unahon. Sige tang hunahuna sa viŕus nagsige sab og saka ang atong 'viru-non.'