Gen. Ferro: ayaw hukmi si Sinas

Ayaw dayon hukmi, huwata una ang resulta sa imbestigasyon.

Mao ni ang awhag ni Police Regional Office (PRO) 7 chief Brig. General Albert Ignatius Ferro sa publiko labot sa pag-imbestigar kang National Capital Regional Office (NCRPO) Director Debold Sinas.

Si Sinas giimbestigar karon tungod sa giingong paglapas niya sa protocol sa enhanced community quarantine atol sa iyang birthday niadtong Mayo 8, 2020.

“Let the course of investigation proceed. I think a person should not be crucified unless the necessary due process is given to him,”

matod ni Ferro sa usa ka teleconference.

Si Ferro niingon nga ang nahitabo karon kang Sinas wa magsalamin sa iyang kinatibuk-ang pagkatawo kay daghan siya og mga maayong nabuhat isip police official.

Nagkauban sila sa NCRPO sa dihang siya pa ang deputy regional director for operations wa pa siya gibalhin sa PRO 7.

Dihang hepe pa sa PRO 7 si Sinas, kapin sa P1 billion nga illegal drugs ang nasakmit sud sa iyang 16 ka tuig nga pamunoan. Siya usab ang nangu sa mga operasyon batok sa New People’s Army (NPA) sa Negros Oriental.

“We should give due credence to the good things that he has done for region 7 and NCRPO. But again we should respect the decision of our authorities, the higher authorities, to conduct investigation,” matod ni Ferro.

Si Sinas nipasabot nga di kadto birthday party, usa lang kadto ka mananita.

Matod niya nga ilang gisunod ang social distancing ug nag face mask. Andam hinuon si Sinas nga moatubang sa imbestigasyon nga gipanginlabutan na sa Malacananng.