SOTTO SUNOD NGA HALIGI SA GILAS: FAJARDO

Nagkausa ang big men sa Gilas Pilipinas nga ang batan-ong higante nga si Kai Sotto maoy umaabot nga labing lig-ong haligi sa RP national team.

Gikan sa beteranong si Junemar Fajardo ngadto kang Poy Erram, ang tanang mga dekalidad nga sentro nagkauyon nga si Sotto maoy mahimong labing gikinahanglan nga sentro sa programa sa Gilas Pilipinas.

"Si Kai nandun," matod ni Fajardo, kinsa 6-time MVP sa Philippine Basketball Association (PBA) ubos sa kampo sa San Miguel Beermen.

Si Fajardo, kinsa lumad nga taga lungsod sa Pinamungajan, Cebu ug produkto sa University of

Cebu (UC) Webmasters, miingon nga dako og na tampo sa paglambo sa kapasidad ni Sotto ang maayo nga training nga gisubay niini. "Sobrang ganda ng training ni Kai ngayon, baka ako pa turuan nun, e," dugang ni Fajardo, kinsa nagduwa sa Gilas Pilipinas gikan pa niadtong 2013. "For me, Kai Sotto," daling tubag ni Erram dihang gipangutana kon kinsa alang kaniya ang mosunod nga labing dominanteng sentro sa nasod. Si Erram, kinsa bag-uhay lang nabahin sa Talk N' Text KaTropa gikan sa NLEX Road Warriors, nagsugog pagduwa sa Gilas Pilipinas niadto pa lang 2018.

Ang duha ka sentro ningpadayag sa ilang panahom sa 'PBA Kamustahan', nga gilusad sa Philippine Basketball Association (PBA) aron itapak sa haw-ang nga hatod sa pagkahunong sa mga duwa sa liga tungod sa pagkuyanap sa coronavirus disease 2019 (Covid-19).

Sa nahiunang episode sa PBA Kamustahan, mao sab kini ang gipadayag sa laing beterano ug dekalidad nga sentro sa PBA nga si Asi Taulava.

Nahisgutan sab ni Taulava si Thirdy Ravena nga posibleng mahimong usa sa umaabot nga mga lider sa Gilas Pilipinas.

"Thirdy is there, too. He's coming in. Thirdy and Kai, I think they're going to be the one or two who's going to be carrying the (national) team," asoy ni Taulava, kinsa padayon gihapong nagduwa sa PBA sa edad nga 47.

Sulod na sab sa pipila ka mga tuig nga nagduwa si Sotto sa Batang Gilas juniors team nga nakatabang pagbaid sa iyang abilidad.

Ang 18 anyos ug 7'2" nga basketbolista bag-uhay lang mipirma og kontrata sa bagong programa sa National Basketball Association (NBA) nga mao ang NBA G League.

Sa G League, ang mga pinili ug dekalidad nga mga basketbolista sa tibuok kalibutan ihamag sa usa ka basketball training nga sama sa professional players. Magdawat na sab sila og suweldo.

Giingon nga moabot sa $200,000 o P10 million ang suweldo ni Sotto sa usa ka season sa NBA G League nga molanat og lima ka mga buwan. / ESL